Madre Yvonne Reungoat nia augúriu ba Reitór-mor padre Pascual Chavez

Pe. Pascual doben,

Ha’u hakarak ko’alia mós hodi Konsellu Jerál no FMA hotu iha kontinente lima nia naran, atu hato’o solenidade ksolok ita-nia Fundadór S. João Bosco nian.

Festa Don Bosco nian koinside ho tinan daruak preparasaun nian ba bisentenáriu nia moris nian no selebra iha Tinan Fiar nia klaran, tempu privilejiadu iha ne’ebé Kreda sente forte kompromisu ba «evanjelizasaun foun ida atu deskobre fali ksolok fiar nian no hetan fal entuzuazmu atu komunika fiar», hanesan Bento XVI subliña iha Motu Proprio Porta Fidei (nº 7).

Santu Padre nia konvite la’o hamutuk ho buat ne’ebé ita mós husu, ho esperansa no sensibilidade apostólika, iha Estreia 2013: oferese ba foin-sa’e sira Evanjellu ksolok nian liuhusi pedagojia laran-di’ak nian.

Obrigada, padre Pascual, tanba rona no halo tuir indikasaun sira ne’ebé Maromak nia Espíritu tau iha ita-nia fuan no neon no ho klareza, komunika iha Estreia anuál hato’o ba Família Saleziana tomak. Ne’e mak dalan ida nakonu ho entuziazmu, konkretu, atuál ne’ebé hafanun iha ema hotu ksolok atu hakbesik ba Don Bosco hodi deskobre ninia grandeza, atu koñese nia no hadomi nia  liután no tuir nia ho laran-luak, iha ninia estilu saran-an apostóliku ba foin-sa’e sira, hodi orienta sira atu hasoru Jezús, Ida mesak ne’ebé fó sentidu ba sira nia moris no sai bee-matan ba ksolok loos.

Sistema Preventivu mak don boot ida ba foin-sa’e hotu mundu nian no ita hotu iha responsabilidade atu hakle’an, atu sai kriativu, atu hatene inkultura nia ohin iha kontestu ne’ebé Família Saleziana hela bá. Don Bosco kontinua ko’alia ho modu estraordináriu ba ita hotu! Nia sei tulun ita atu sai ba beibeik ema sira ne’ebé bele hadaet karizma!

Urna Don Bosco nia peregrinasaun iha parte barak mundu nian halakan entuziazmu foun, devosaun kle’an no admirasaun ba figura poliédrika edukadór santu ida-ne’e nian. Ha’u halo votus atu pasajen santidade nian ida-ne’e kontinua hamosu dalan espirituál konversaun interiór foun no pastorál ne’ebé, hanesan ita hameno dala barak, sai kondisaun ba fekundidade planu tomak nian iha dimensaun sosiál, kulturál, profisionál no anúnsiu esplísitu Evanjellu Jezús nian.

Dalan konversaun ida-ne’e hakarak sai don ne’ebé, nu’udar FMA, ami hakarak oferese ba ita iha okaziaun festa ita-nia Fundadór nian.

Ami presiza ita-nia orasaun sira no husi ami-nia maluk salezianu nian, atu bele ba oin ho desizaun no korajen liután, ho foin-sa’e feto no mane sira iha dalan santidade saleziana.

Ha’u agradese ita, padre. Pascual, ba di’ak ne’ebé ita nafatin hatudu mai ami no ba ita-nia sasin moris nian ne’ebé mantein moris iha ami-nia fuan ahi da mihi animas cetera tolle nian.

Ha’u asegura ha’u-nia orasaun pesoál ba ita no ida Institutu tomak nian, ba buat hotu ita soi iha ita-nia fuan. Ami harohan ba Maromak, hodi Maria Tulun-Na’in nia intersesaun, don saude nian, atu ita bele kontinua sai, ba Família Saleziana tomak, roman ne’ebé orienta, sustenta, enkoraja ami atu sai sasin fiél, haksolok no kredivel vokasaun saleziana nian iha ninia espresaun tomak.

Ha’u laran metin iha ita-nia orasaun atu ida-ne’e mós realiza duni iha FMA hotu nia moris, atu bele hafanun iha foin-sa’e barak nia fuan, hakaran atu tuir Jezús ho radikalidade, hodi foti dalan konsagrasaun espesiál nian..

Ha’u-nia orasaun sai hamulak ida atu husu ba Maromak, ho insisiténsia, atu aumenta vokasaun sira iha Kreda, iha Kongregasaun Saleziana, iha Institutu FMA no iha grupu ida-idak Família Saleziana nian.

Ba ita, padre Pascual doben, no ba Salezianu sira hotu, ami hafoun ami-nia votus ba solenidade Don Bosco nian, ho ami-nia orasaun no gratidaun.

Ir Yvonne Reungoat fma