Jakarta – Ohin loron ita hanoin hodi komemora ita nia inan no ko-fundadora madre Mazzarello. Iha loron grasa ida-ne’e Ir. Ana Manuela no Ir. Luisa hamutuk ho katekista Mathew prepara Katekúmenu foun na’in 18 ne’ebé sei simu sakramentu Baptismu no Primeira Komuñaun iha festa Pasqua 2016.

Retiro hahú ho Eukaristia iha kapela Wisma Don Bosco – Jakarta, iha tuku 7.00 oras Jakarta. Remata Eukaristia kontinua ho konferensia husi padre José Ola, diretor komunidade Post Novisiadu Wisma – Jakarta. “Hakarak sai Jezús nia eskolante, moris tuir Ninia hanorin sira“. Ida ne’e mak tema atu hakle’an iha retiro ida ne’e. Padre José tulun katekúmenu foun sira tama kle’an liutan “sai Jezús nia eskolante” nia sentidu. Sai Jezús ninia eskolante signifika hola parte ho Jezús iha ninia Kreda ho Sakramentu inisiasaun, hafoun brani haklaken iha moris loron-loron nian, espesialmente fo sasin, la’os iha situasaun diak deit maibé mós iha tempu susar hanesan ita nia sarani balun hatudu ona hodi fakar ran tanba fiar ba Jezús Kristu.

Remata konferénsia kontinua hodi fahe esperiénsia fiar nian no ida-idak nia naran sarani ne’ebé hili ninia sentidu no sira nia mehi ba futuru nu’udar membru foun kreda nian. Katekúmenu sira ne’e iha esperiénsia pesoál ne’ebé diferente. Balun mai husi relijiaun Islam, balun mai husi relijiaun Budha no seluk tan husik Protestante. Iha seluk família tomak muda relijiaun tanba esperiénsia forte ne’ebé halo iha Ospitál, bainhira moras nia maluk katóliku sira ne’ebé iha kuartu hanesan reza ba sira. Iha mós adolexente ida, tinan 14 nia inan aman relijiaun Islam maibé nia mesak mak hili atu sai Katóliku, durante lisaun no misa iha fulan sia nia laran, kalan ka loron nia mai mesak ho transporte públiku. Liuhosi esperiénsia hirak ne’e sira rasik hateten katak sai “Katóliku ne’e grasa no vokasaun ida espesial husi Maromak.

Ikus mai, sira nia festa agradesimentu nian sei hala’o iha dia 10 april 2016 hamutuk ho orfaun sira iha Cibubur–Jakarta Timur.

(Luisa Fernandes)