Baucau – Komunidade edukativa FMA-Baucau hasae agradese ba Maromak, tanba bele koko ohin, 13 Marsu, Ninia laran-sadia ho peregrinasaun hala’o hamutuk, hodi hakat liu “Odamatan Mizerikórdia” nian. Labarik no foin-sa’e sira husi Oratóriu Teulale no Diwake, labarik no adolexente misionária, feto-raan sira husi grupu Laura no Asmaba (asrama Maria Auxiliadora Baucau), ADMA no Antigas Alunas FMA hatudu sentidu peniténsia nian iha Domingu V Kuarezma nian hodi la’o husi Campo Alegria to’o ba Katedrál hodi reflete kona-ba “Obra mizerikórdia  sira”. Peregrinasaun ne’e sai momentu ida tan ba preparasaun Páskua, depoizde “adorasaun oras 24 ba Na’i”.

Peregrinasaun fahe ba momentu sira hanesan momentu konversaun, iha-ne’ebé peregrinu sira halo ezame konxiénsia kona-ba obra mizerikórdia sira; momentu profisaun fiar nian; momentu orasaun ba Kreda  no nia Bibi-Atan sira liuliu Amu-Papa no Bispu Dioseze nian; no momentu hakbesik ba Sakramentu Rekonsiliasaun no ikusliu no  tutun peregrinasaun nian mak Eukaristia-agradesimentu ba grasa hotu simu.

Durante momentu konversaun peregrinu sira la reza no hananu de’it , maibé, halo mós atividade oioin kona-ba obra mizerikórdia sira no fó sai sira-nia empeñu. Atividade sira ne’ebé halo mak partilla paun; halo puzzle kona-ba Maromak nia Liafuan no logotipu Tinan Mizerikórdia;  tau ai-tahan hahalok di’ak nian ba ai-hun; dramatiza S. Martinho nia moris; halo lista kona-ba maluk sira ne’ebé moras iha bairu atu bá vizita, identifika santu sira no sira-nia obra mizerikórdia espesífiku, nst. Hafoin bainhira tama iha Katedrál, grupu ida-idak tau ninia empeñu iha ilas Jezús Divina Mizerikórdia nia ain.

Buat ne’ebé furak mak grupu ida-idak partisipa ho modu ativu, la’ós de’it bainhira halo sira-nia parte, maibé mós tuir ho di’ak grupu seluk bainhira sira hato’o sira-nia empeñu ka ho modu kriativu halo sira-nia atividade.  Maibé furak liután mak ksolok grasa nian husi Maromak nia mizerikórdia ne’ebé suli ba hotu-hotu ne’ebé partisipa hodi manán Maromak nia perdaun eh induljénsia.

Hanesan ita hatene, atu manán induljénsia iha Tinan jubilár husu kondisaun sira hanesan tuirmai ne’e:

• Iha estadu grasa nian: katak hili ho konxiénsia no liberdade atu hakribi salan hotu atu loke an ba moris foun.
• Selebrasaun sakramentu Rekonsiliasaun no Eukaristia nian: selebrasaun ne’e hatudu ita-nia hola-parte/pertensa ba Kristu no ita-nia hola-parte ba Kreda nia moris.
•  Orasaun ba Amu-Papa nia intensaun sira, nu’udar sasin komuñaun nian ho Kreda tomak.
• Hahalok karidade nian ne’ebé esprime konversaun fuan nian nu’udar rezultadu sakramentu sira-nian. Peregrinasaun ba Bazílika jubilár ida, ho pasajen liuhusi “ODAMATAN MIZERIKÓRDIA NIAN” mak hahalok ida karidade nian.