Dili – Selebrasaun Solene ba Festa S. João Bosco iha Comoro-Dili ba tinan ida ne’e adianta tanba Antigos Alunos sira hakarak selebra iha Domingo 27, atu nune’e ema hotu bele partesipa tanba dia 31 loron servisu nian nune’e karik Misa ema barak sei la tuir tanba iha responsabilidade seluk.

Molok loron festa ne’e hala’o tiha novena no iha sábadu loron 26, konferénsia ba Família Saleziana kona-ba Don Bosco nia pedagojia.

Enkontru família saleziana soi nu’udar oradór sira señor João Câncio Freitas kona-ba Sistema Preventivu no Edukasaun iha Timor-Lesta; señor Adérito de Jesus kona-ba Sistema Preventivu: prevensaun no kombate korrupsaun; no padre João Aparício kona-ba padre Pascual Chavez (Reitór-mor) nia estréia.

Misa festa nian halo horisehik, 27 Janeiru ho selebrante prinsipál padre Joao Paulino Aparicio Guterres (provinsiál sdb) no konselebra ho salezianu balun.

Durante omilia padre João ko’alia kona ba Estreia Reitór-mor nian kona ba Pedagogia Salesiana hodi tama ba tinan rua prepara-an ab Bisentenariu DB nian ne’ebe sei selebra iha 2015 no mós fo hanoin tinan ida ne’e FMA sira sei selebra 25 anos prezensa iha Timor- Leste no 50 anos przeensa Salesianos iha Fatumaka nudar Escola Técnico ba dala uluk iha Timor. No mos la’o hamutuk ho Kreda universal ne’ebe dedika Tinan ida ne’e baTinan Fiar nian atu ita hamutuk hametin liu tan ita nia domin ba Kristu Nia Kreda liu husi ita nia servisu edukasaun no Evanjelizasaun ba foinsa’e sira. Salesianos iha tanba foinsa’e sira tanba ne’e nia konvida Família Saleziana tomak atu hamutuk serví foin-sa’e sira tuir Espiritualidade ita-nia Fundadór S. João Bosco husik hela.

Molok bensan finál, padre João fó tempu ba Madre Paola atu hato’o liafuan ruma kona-ba prezensa FMA tinan 25 iha Timor-Leste. Madre Paola hato’o mensajen ho surat ne’ebe nia simu husi Don Bosco hodi kalan atu fahe ba foinsa’e sira. Don Bosco husu ba foinsa’e sira se sira haksolok ka lae? “Buka ksolok loos hodi hili liberdade loos ne’ebé lori imi ba Maromak. Labele hili Liberdade ida ne’eée lori imi ba nakukun no triste hodi la haksolok iha imi nia moris. Imi foinsa’e sira mak ami nia misaun prioritáriu la’o hamutuk ho imi ba dalan santidade saleziana” nia hateten. Hafoin nia foti Don Bosco nia fraze ne’ebé dehan: “Ha’u-nia hakarak atu imi haksolok nafatin no fó folin ba imi-nia moris nu’udar foinsa’e”.

Hafoin Misa remata tiha konvidadu hotu bah an hamutuk iha komunidade Post- novisiado hafoin kontinua fali ho teatru iha Gym husi reprezentante Família Saleziana sira no mós ikus liu dada sorte ikus ba sira ne’ebé sosa tiket no ida ne’ebé hetan sorte nia manán motór ida.

(Ermelinda Gomes FMA)