Dili –  Projetu formativu FMA sira-nian, fó importánsia boot  liu ba formasaun permanente. Iha itineráriu idade ida-idak nian buka  atu formasaun kona aspetu karakterístiku idade ida-idak nian, liuliu knaar dezenvolvimentu sira ne’ebé idade ne’e tenke fó atensaun prioritária.

Nune’e mak iha loron 5 Marsu, grupu segunda idade halo enkontru formativu ida ne’ebé ko’alia kona-ba aspetu psiku-fíziku eh saude ne’ebé idade ne’e enfrenta… Nu’udar ema, ho idade ita-nia sélula sira komesa dejenera no atrofia, no lori impaktu ba saude.

FMA sira husu médiku obstreta-jinekólogu ida atu esplika mudansa psiku-fízika sira ne’ebé bele afeta feto ida ho idade entre 40-55 no oinsá enfrenta. Baibain períodu ne’e hanaran períodu klimatériu, períodu molok tama menopauza to’o pós-menopauza. Hasoru situasaun ne’e bele hamosu impaktu oioin ba feto nia saúde enjerál no nia presiza konxiente kona-ba buat sira ne’e hodi prepara an hasoru situasaun naturál ida-ne’e.

Dr. José António, ne’ebé fasilita formasaun ne’e, esplika kona-ba sintoma sira asosia ho menopauza mak sente manas no kosar derepente iha fatin ruma isin nian hanesan oin, hirus-matan, kakorok; toba la di’ak, akontese instabilidade emosionál, depresaun, ansiedade, irritada, lakon memória…; moras isin no múskulu; ‘urogenital symptons’, hanesan la tahan soe bee ki’ik, nst.

Irmán sira despoizde sesaun input, hato’o pergunta barak liga ho eventu krítiku ne’e, kona-ba sintoma oioin sira hasoru, kona-ba dieta, kona-ba moras risku sira liuliu ‘cardiovascular’ no osteoporosis iha idade ida-ne’e, moras kankru, nst. Buat ne’ebé importante mak iha akompañamentu no aseitasaun ba realidade ida-ne’e, halo ezersísiu fíziku, meditasaun… Tuir Dr. José António, la iha problema kona-ba ne’e, ne’ebé la iha solusaun.