Irmán, leigu no foin-sa’e doben sira,

fulan hirak ne’e Maromak prepara “surpreza” oioin mai ita. Uluklai, hanesan hotu-hotu hatene, Diozese Dili nian hetan ninia bibi-atan foun: pe. Virgilio do Carmo da Silva, Superiór ba Vise-provínsia SDB “Callisto Caravario”. Se padre Jezuita sira iha votu ida tan kona-ba obediénsia ba Amu-Papa, Don Bosco, maski la halo votu ida ne’e, prontu nafatin atu hatán ba Amu-Papa nia hakaran, maski ki’ik. Bazílika “Sacro Cuore” nian iha Roma fó sasin kona-ba ita-nia Fundadór nia disponibilidade, ne’ebé la sukat kolen, atu halo tuir buat ne’ebé Amu-Papa husu. Pe. Virgilio mak Don Bosco nia oan di’ak, ne’ebé tuir nia Aman no Mestre nia ain-fatin, tan ne’e, nia mós hatán Sin ida, nakonu ho fiar, ba buat ne’ebé Amu-Papa husu ba nia. Iha tinan ida ne’e, ne’ebé Pe. Virgilio gia salezianu sira nia Inspetoria, ita apresia ninia prudénsia, ninia sensibilidade ba aspetu formativu, ninia dezeju atu buka ema hotu nia di’ak no ninia disponibilidade fraterna atu serbisu hamutuk no favorese katak Irmán sira, Padre Salezianu sira no Família Saleziana tomak bele hala’o sira-nia misaun ho fidelidade ba ita-nia karizma.

Ita sei reza ba nia, atu Espíritu Santu bele haroman knaar foun ne’ebé nia simu no tulun nia atu nia bele lori Diozese Dili nian atu la’o tuir Maromak nia projetu.

Ita la’o daundaun iha tempu Kuarezma nian: iha ninia mensajen, Amu-Papa fó hanoin katak mizerikórdia bele nakfilak ema nia laran no presiza sai konkretu iha ita-nia hahalok sira; tan ne’e nia konvida sarani hotu atu hala’o obra mizerikórdia korporál no espirituál, hodi la haluha katak ema sira ne’ebé ita hasoru mak Jezús nia “isin”. Bainbain, iha tempu Kuarezma nian, ita-nia komunidade sira hili empeñu ruma ne’ebé halo sira partisipa besik liután ba Jezús nia terus, maibé durante Jubileu Mizerikórdia nian, ha’u hanoin katak Maromak husu mai ita atu sai radikál liután iha ita-nia hilin sira, katak atu hatudu ita-nia hakaran atu halo ita-nia fuan sai hanesan Jezús nia Futar Fuan mizerikordiozu ho hahalok ruma konversaun nian. Madre Jerál no Konselleira sira, iha Sirkulár korál, propoin ba Inspetoria ida-idak atu selebra mizerikórdia iha loron penitensiál espesiál ida, iha ne’ebé bele husu perdaun no hahi’i Na’i ba buat ne’ebé Nia halo iha ita-nia moris, iha foin-sa’e sira no iha komunidade edukativa nia moris. Inspetoria sei fó sai modalidade atu hala’o loron ida ne’e “hamutuk”, nu’udar realidade ida de’it, maski hala’o iha komunidade 12.

Tinan kotuk Amu-Papa, iha mensajen ba Kuarezma, ko’alia kona-ba “tasi indiferensa nian”, oras ne’e nia sadik ita atu haboot “tasi mizerikórdia nian”. Iha “tempu favoravel” ida ne’e, hanesan S. Paulo dehan, ida-idak bele sente katak ninia esforsu atu nakfilak ninia an rasik, loke matan hodi hateke ba maluk sira ho kompaixaun no moris ho kapasidade atu perdua, bele “lori bee” uitoan ba tasi ida ne’e.

No, ikus nian, iha tempu ida ne’e ita sei prepara komunidade sira atu selebra Madre Jerál nia Festa Agradesimentu nian. Inspetoria Tailándia nian, iha ne’ebé sei selebra Festa, konvida komunidade hotu atu halo reflesaun no dalan hodi prepara ba momentu selebrasaun nian. Preparasaun ida ne’e sei tulun ita atu hakle’an proposta sira ne’ebé mai husi Kapítulu Jerál XXIII no Jubileu Mizerikórdia nian hodi deskobre kondisaun sira ne’ebé favorese katak ksolok no esperansa buras iha ita-nia moris no ita-nia misaun. Inspetoria Tailándia nian fó hanoin mai ita katak “Mai ita, mizerikórdia hetan tradusaun iha espíritu família nian, iha ne’ebé fuan sei nakloke ba Maromak nia dimensaun, katak domin no mizerikórdia. Se domin ida ne’e hamanas ita, sira ne’ebé hakbesik ita bele sente kedas!”

Ho fraze ida ne’e ha’u aproveita atu fó ha’u-nia kumprimentus ba loron Páskua: husik Jezús Moris hi’as hamanas ita-nia laran, atu ita bele sai manu-ain ksolok no esperansa nian iha ita-nia povu nia leet.

Ho fuan nakonu ho agradesimentu,

Ir. Alma Castagna