Venilale – Iha loron Domingu, 28 Fevereiro 2016, Monseñor Ionut Paul Sterjac, reprezentante Santa Sé iha Timor-Leste mai iha Venilale partikularmente iha Parókia Sagrado Coração Venilale atu hatutan mensajem husi Amu Papa Francisco iha ninia Ensiklika Laudato Si. Sarani Parókia Venilale simu ho ksolok no partesipa iha konferensia ida-ne’e. Molok nia hahu konferénsia, Orfán sira husi Orfanato São Domingos Savio Venilale, hato’o Teatro badak “Opera Laudato Si”. Iha Teatru Opera ne’e subliña ona importánsia Ensiklika nia mensajem no hanoin tuir komprensaun labarik sira nian. Teatru ne’e ninia motivasaun atu tulun sarani sira, Jovens sira no labarik sira atu hatene mensajem importante ensiklika nian hodi tau matan ba ambiente no liuliu foti asaun konkretu hodi tau iha prátika.

Durante konferénsia Monseñor esplika klaru fuan mensajem Ensiklika ida-ne’e, ne’ebé riku no sadik ita hotu atu tau matan no hadomi Maromak Nia kriasaun. Pergunta barak no ideia barak ne’ebé povu sarani venilale, estudantes husi Escola Técnico-Professional Venilale, escola ESSA filial de Baucau, Pre-Seminario, Irmán sira husi Wailili, eskola publika Pre-Secundario no Secundaria, hakarak tau iha sira nia planu no linã de asaun depoizde Kuarezma. Planu de asaun sira ne’e mak hanesan: sensibiliza kuda-aihun, hafurak Venilale husi Oratóriu Maria Auxiliadora sira (hamos no kuda ai-hun iha fatin ne’ebé laiha ai-hun no mahon), halo Lixu fatin husi bidon atu tau iha estrada ninin no sensibiliza ema atu soe foer iha fatin loos. Hodi taka ba konferénsia ne’e Monseñor haksolok tebes ho planu sira ne’ebé hatoo ba nia no nia hakarak mehi hamutuk ho povu venilale atu halo Timor Leste sai furak no moos.

(Angelita Gomes)