Dili – Loron 27 Fevereiru, Família Saleziana iha Timor-Leste halibur hamutuk atu hasae agradesimentu ba Maromak ba P. Virgílio do Carmo da Silva, eis-provinsiál SDB, ne’ebé simu vokasaun foun nu’udar bispu ba dioseze Dili.

Grupu sira Família Saleziana prezente iha Timor-Leste mak SDB, FMA, Salezianu/a kooperadór/a, ADMA, Antigu/a alunu/a sira SDB no FMA nian, VDB.

Agradesimentu nia tutun mak Eukaristia ne’ebé prezide husi bispu eleitu no konselebra husi salezianu na’in 29, iha kreda Maria Auxiliadora, Comoro. Iha ninia omilia, P. Virgílio hateten katak, ninia devér duni atu agradese Maromak mizerikordiozu ne’ebé hatudu ba nia no nia mós rekoñese katak lahó Don Bosco, lahó Maria Auxiliadora, nia sei sai saida loos?

Leitura sira Evanjellu nian foti husi komún Na’i-Feto nian, no evanjellu kona-ba Jezús nia parente sira. P. Virgílio resalta natureza “Família Saleziana” nian, nu’udar vokasaun no identidade iha Kreda, no Maromak mak hili ita atu hola parte iha família ida-ne’e. Hafoin nia mós konvida membru hotu Família Saleziana nian atu sai “profesia, prósimu/besik no lori esperansa” hanesan Amu-Papa Francisco husu ba Vida Konsagrada iha loron 1 Fevereiru 2016. Esplika oinsá moris buat tolu ne’e, nia foti ezemplu husi misionáriu salezianu sira, hanesan P. Locatelli, Ir José Cusi, Ir Carlo Gamba, P. Luigi di Pietro, Ir José Ribeiro… Sai profesia hodi moris tuir regulamentu rasik nu’udar  dalan domin no santidade nian; moris iha prosimidade hanesan Don Bosco halo hodi bá buka labarik no foin-sa’e sira iha kadeia, iha lurón sira; no moris ksolok no otimizmu, katak esperansa nu’udar karakterístika típika saleziana.

Hotu tiha Misa, selebrasaun kontínua ho almosu konfraternizasaun no fó kumprimentu ba Amu Virgílio. Grupu ida-idak aprezenta sira-nia votus ho hananu, drama ka rekordasaun ruma. Labarik sira husi eskola Maria Auxiliadora halo akrónimu ida  ho liafuan “Don Virgílio da Silva: Don Virgílio do Carmo da Silva SDB; Oan husi senhora Isabel no senhor José; ne’ebé Na’o fihir atu sai nia Bibi-atan ida; Venilale no Ossú nia oan; ida ne’ebé Na’i hili horiuluk kedas; Rahun di’ak tan ita bele simu knaar; gestu ne’ebé la’o tuir Jezús nia dalan; ita mak sei sai ami-nia bibi-atan; lori bibi sira, ba fatin furak no matank; iha parókia Maria Auxiliadora nia oan sira hato’o; obrigadu wain basu, ba ita laran-luak. Dala barak maka ita sei hateke ba Krús; atu bele mór lori krús todan tuir Jezús. Se kark ita iha laran taridu; ita iha knaar nu’udar bispu; lalika laran-susar, no fiar metin bá; Virjen Imakulada, padroeira dioseze nian; atu hodi nia futar unuk sei satan netik ita. Amén!”

Irmán FMA sira mós hato’o sira-nia votus ho knananuk no liuhusi provinsiál FMA nia mensajen foti husi Don Bosco nia liafuan sira ba nia belun ida ne’ebé sai bispu: “Ha’u fó bensan ba Na’i, tanba ha’iu iha konviksaun katak Kreda manán Bispu ida tuir Maromak nia fuan no ita bele halo buat di’ak barak iha dioseze…”

Ita harohan atu bispu foun bele sai duni “Bibi-Atan” Kreda nian, Mestre doutrina nian, amlulik kultu sagradu nian no ministru governu nian” (Can.375). Ninia lema episkopál mak “Caritas Christi urget nos” no iha ninia logotipu bele hetan elementu sira hotu ne’ebé esplika rai Timor-Leste, dioseze Dili, elementu salezianidade nian, no knaar sira bispu nian.