Iha etapa datoluk ita-nia dalan ba Páskua ita simu bolun, dala ida tan, atu hanoin filafali ita-nia ezisténsia. Tema fundamentál liturjia ohin nian mak “konversaun”. Tema ida-ne’e liga ho tema libertasaun nian: Maromak libertadór propoin mai ita transformasaun ba ema foun, livre husi moris atan ba egoízmu no salan, atu ita bele manifesta moris nakonu, moris mai husi Maromak.

Iha Evanjellu nia laran, ita hetan konvite ida ba transformasaun radikál ezisténsia nian, mudansa mentalidade nian, atu t ita-nia moris tau iha sentru Maromak nia valór sira nu’udar prioridade fundamentál. Se ida-ne’e la akontese, Jezús dehan, egoízmu mak sei kontrola ba beibeik ita-nia moris no nia sei lori ita ba mate.

Leitura daruak fó hanoin mai ita katak kumpre ritu esternu sira no mamuk la’ós buat importante ida; buat ne’ebé importante  mak adezaun loos ba Maromak, vontade atu aseita ninia proposta salvasaun nian no moris ho Nia iha komuñaun íntima.

Leitura dahuluk  ko’alia mai ita kona-ba Maromak ne’ebé la suporta injustisa sira no katak Nia nafatin prezente iha sira ne’ebé luta ba libertasaun. Maromak libertadór ida-ne’e mak ezije husi ita luta permanente ida hasoru buat hotu ne’ebé hahata/eskraviza ita no impede moris nakonu nia manifestasaun.

Download