RV- Papa Francisco simu iha audiénsia segunda (01/02), iha Sala Paulo VI, Vaticano, partisipante sira Jubileu Vida Konsagrada nian. Amu-Papa hateten ba konsagradu/a sira katak sira simu bolun atu haklaken realidade Maromak nian liuliu ho sira-nia moris no la’ós de’it ho liafuan sira. “Reljiozu sira no relijioza sira, mane no feto konsagrada sira ba Na’i nia servisu ne’ebé ezerse iha Kreda dalan ida pobreza forte, domin kastu ne’ebé lori sira ba paternidade no maternidade espirituál ba Kreda tomak, obediénsia ida”, Papa Francisco dehan hodi resalta elementu tolu: profesia, prosimidade no esperansa.

“Profesia mak dehan ba ema sira katak iha dalan ida ksolok nian, grandeza nian, dalan ida ne’ebé hakonu ó ho ksolok, Jezús rasik nia dalan. Dalan atu besik ba Jezús. Profesia mak don ida, karizma ida no tenke husu ba Espíritu Santu… Profesia mak dehan katak iha buat ruma ne’ebé loos liu, furak liu, boot liu, di’ak liu ne’ebé ita hotu simu bolun ba ne’e.”

Hafoin Santu Padre, husu relijiozu/a sira atu sai prósimu/besik ba mane no feto ida-idak.

“Vida konsagrada tenke lori ha’u ba prosimidade ho ema: prosimidade fízika, espirituál, koñese ema sira”, hodi fó hanoin katak prósimu uluk liu konsagradu/a ida-nian mak Irmaun eh Irmán komunidade nian. “Ne’e mak prosimidade ida ne’ebé furak, di’ak, ho domin”.

Terrorizmu gossip nian mak maneira ida atu hadook an husi maun-alin no biin-alin sira iha komunidade rasik , Amu-Papa hateten. Basá “ema ne’ebé halo gossip terrorista ida. Nia terrorista ida iha ninia komunidade rasik, basá nia soe liafuan hanesan bomba ida kontra ida-ne’e, kontra ida seluk… , hafoin bá ho hakmatek. Harahun! Ema ne’ebé halo ida-ne’e, harahun… ida-ne’e la’ós prosimidade: ida-ne’e katak halo funu! Ida-ne’e ó hadook an, ida-ne’e provoka distánsia, provoka anarkia iha komunidade. No se, iha Tinan Mizerikórdia nian ida-ne’e, imi ida-idak konsege atu la halo an terrorista ibun-boot mane no feto, ne’e susesu ida ba Kreda, susesu ida santidade boot nian”, Amu-Papa subliña.

Hafoin, Santu Padre konvida konsagradu/a sira atu simu vokasaun sira ho seriedade. “Tanba sá mak vida konsagrada nia knotak sai kiuk loos? Kongregasaun balun halo esperimentu “inseminasaun artifisiál”. Saida mak sira halo? Sira simu…: “Sin di’ak, mai, mai, mai…”. Hafoin hahú mosu problema sira.”

Tuir Papa Francisco, “Tenke dixerne di’ak se ida-ne’e vokasaun loos ida no tulun nia atu buras”. “Sai  konsagradu la signifika sa’e eskada ida, rua, tolu iha sosiedade, la’ós status sosiál ne’eb’e halo atu hateke ba ema husi leten ba kraik”, Amu-Papa hateten tan.

Santu Padre salienta katak “kontra tentasaun atu lakon esperansa, ne’ebé esterilidade ida-ne’e fó, ita tenke harohan liután. No harohan hodi la kole”. “Ita-nia Kongregasaun presiza oan-mane sira, ita-nia Kongregasaun presiza oan-feto sira. Imi-nia fuan iha falta vokasuan nia oin, tenke harohan maka’as liu. Na’i ne’ebé laran-luak sei la haluha ninia promesa”, Amu-Papa remata ninia liafuan sira.