Dili – Molok atu tama ba festa konsagrada nian ne’ebé selebra iha loron 02 Fevereiru, “Conferência Superiores Maiores Timor Leste” deside hamutuk atu halo Espozisaun  ne’ebé  halao  iha salaun Parókia Balide, hahú iha  loron 27  Janeiru too 30 Janeiru 2016. Espozisaun  ne’e hatudu  kona ba kongregasaun ida-idak nia karizma ne’ebé buras iha Kreda Timor-Leste, liu-liu iha Dioseze Dili.  Objetivu ba espozisaun ne’e mak uluknanai atu taka Tinan Vida konsagrada nian iha loron 02 Fevereiru no mós  hatudu  karizma kongregasaun ida-idak nian liu husi meius oin- oin, liu husi brochure, atividade  pastorál ne’ebé hala’o no mós fotografia sira ne’ebé hatudu karizma nia oin iha Kreda ohin loron

Iha enseramentu nee Padre Gabriel Suban SVD, nudar  prezidente hateten: “Objetivu ba ezpozisaun ne’e nudar atividade ida ne’ebé  kria iha relijiozu/a sira moris fraterna iha família relijioza nia laran, ho liafuan seluk dehan “signum Fraternum” entre ita konsagradu/a sira  hodi  hatudu  ba mundu Kristu nia oin iha Kreda liu husi ita-nia sasin fraternal”.

Iha enseramentu ne’e foin-sa’e sira mós hola parte iha eventu ne’e. Nune’e padre Grabriel subliña  liután katak ho foin-sa’e sira nia prezensa sai mai ita esperansa no ksolok  ne’ebé sai sasin vizivel nian iha Kreda hodi la’o hamutuk ho sira.

Molok atu tama ba salaun “expo” nian, Ir Maria Letizia, FMA mak tesi  fita  ba eventu ne’e  ho razaun katak tinan ne’e madre Maria Letizia  sei selebra tinan 50 moris konsagrada  no  hatudu mai ita sasin fidelidade nian ba Maromak  iha nia vida konsagrada.

Iha loron 01 Fevereiru 2016, Relijiozu/a sira halibur an hamutuk iha uma Canosiana Becora,  hahú  loron dahuluk ho konferénsia husi Primeira Dama Sr. Isabel Fereira ho tópiku “ Leigos sira nia perspetiva no expetativa  ba Konsagradu/a sira ohin loron”.

 Sr. Isabel sente orgullu tanba nia bele hetan oportunidade  atu partisipa iha Konferénsia ida-ne’e, kon-aba enserramentu Tinan Moris Konsagrada nian ne’ebé Sua Santidade Papa Francisco deklara iha loron 21 fulan Novembru tinan 2014.

Señora Isabel, husu atu ema konsagrada sira bele sai prezensa ne’ebé sasin no tulun atu “rekupera fé kristán, fó importánsia ba estilu moris simples, la kiak, maibé ho dignidade no moris-di’ak sufisiente”. Ninia preokupasaun mak oras-ne’e iha “krize boot kona-ba valór sira ne’ebé tau prova ba ita nia fé, domin ba Maromak no maun alin sira. Ita verifika mós katak ema barak valoriza liu sasán, rekompensa, títulu no pozisaun sira, asume nune’e títulu ida ne’ebé boot liu fali ninia posibilidade sira.Ita hakarak liu-tan buat luxu, ko’alia ita nia viziñu sira nebe iha susesu no ita haluha atu agradese ba buat sira nebe ita iha”.

Mons. Ionut Paul Strejac fali, hato’o konferénsia kona-ba tema “Vida konsagrada no Maromak nia oin laran-sadia nian”. Nia subliña atu ema hakat liu tiha ninia frajilidade rasik, bele sai profeta ne’ebé haklaken Maromak laran-sadia. “Laran sadia, sai nudar kartaun identidade Maromak nian…Maromak nia identidade”. Iha ita-nia moris prosesu konversaun espirituál nian ita mós loron ba loron halo dalan atu “sai laran-sadia”, iha nafatin “movimentu transformasaun nian” tuir “Jezús” ita-nia modelu.

Iha lokraik loron 2 Fevereiru, oras tuku 17:30, taka Tinan vida Konsagrada nian ho Eukaristia Santa  iha Katedral ne’ebé prezide husi bispu eleitu D. Virgilio do Carmo da Silva, Sdb, ho Na’i-lulik no Relijiozu sira na’in 45. Molok atu hahú misa iha selebrasaun iha li’ur ho superiór/a sira kada kongregasaun ne’ebé reprezenta lori lilin ba altar.

Iha omilia ne’ebé Amu Virgílio fo hanoin pontu ruma ba relijiozu/a sira kona-ba sasin moris ne’ebé sai atrasaun ba foin-sa’e sira  atu tuir ka hili dalan hanesan ita.  Nia salienta katak, “ita-nia parte mak presiza hakiak relasaun forte ho Maromak. Sai relijozu/a katak sai profisionál ka radikál ba Maromak. Amu Virgílio husu se iha ita-nia konventu sira Kristu mak sai sentru ita-nia uma nian atu ema bele haree hetan Kristu, eh refetóriu ka sala Televizaun mak sentru ba ita komunidade sira? Ita relijioza mak ema Maromak nian tanba ita halo tuir Maromak nia hakarak hodi moris iha profesia, prosimidade no esperansa”, nia hateten hodi nalian Papa Francisco nia mensajen.

(Ines Bartolo Freitas)