Dili – Iha loron 29 too 30 Janeiru 2016, foin-sa’e barak mai iha uma salesiana Balide (FMA )atu halao atividade Kampu Don Bosco. Joven sira ne’ebé partisipa hamutuk 255 Joven, feto e mane. Sira mai husi: Eskola Sekundaria Sao Jose Operario Balide, Joven parókia Balide, Centro Miguel Magone, Sentru Dejukdil, Eskola Sekundária 04 Setembru, Jovens Maskarinhas, Joven sira ne’ebé kursus Computer no mos animadór/a oratóriu Sentru sira.
Atividade Kampu Don Bosco ne’e hanesan eko fila fali buat ne’ebé halo ba foin-sa’e sira ne’ebé partisipa iha MJS tinan uluk nian (Bisentenáriu Don Bosco nian)
Kada grupu ida-idak Irmán no Irmaun sira mak fahe kona ba Don Bosco nia moris iha parte 3 mak hanesan:
Colle mak fatin ne’ebé sublina liu kona ba nia moris infánsia no família nian ne’ebé sai esperiénsia forte ho Mama Margarida ne’ebé eduka nia oan Joaozinho deskobre nia vida espirituál ne’ebé tasak no hakle’an liafuan diak ne’ebé sai katekeze lor-loron nian ba nia.
Chieri fatin ne’ebé nia hetan matenek no hetan valor aas liu iha eskola. Iha fatin ne’e mos nia hetan belun barak no mos nia hari “Sosiedade de Alegria “ hodi halo promesa la ko’alia aat no mos kuda devosaun boot ba Na’i-Feto.
Valdoco mak sai fatin misaun nian, liu-liu foin-sa’e sira ne’ebé halibur an hamutuk iha oratóriu. Iha oratóriu mak Don Bosco hanorin valor sira oin-oin umanu nian ba foin-sa’e sira, hodi kria ambiente família nian. Don Bosco nia mehi mak atu eduka foin-sa’e sira ho domin no karidade, pasiénsia, otimizmu no laran-metin iha sira, abut iha Sistema Preventivu, Rajaun, Relijiaun no mós domin.
Hodi rona liafuan sira ne’ebé Irmán sira fahe iha grupu laran halo foin-sa’e sira apresia liu ba Don Bosco nia moris ne’ebé sira dala barak larona, foin dala uluk sira rona detallu kona ba Don Bosco nia moris thusi kiik too sai Nai lulik. Esperensia ne’ebé foin-sa’e sira hetan iha kampu Don Bosco nian ne’e mak valor Sakramentu no orasaun nian liu husi orasaun dadeer, kalan (halo Taize), no amizade ho maluk sira seluk ne’e mak esperiénsia forte ne’ebé sira foin halo. Ikus liu taka kampu ne’e ho misa ba Don Bosco, prezide ba misa ne’e mak Padre Yohanes Laba Tolok, Sdb.

(Ines Bartolo Freitas)