Ha’u-nia foin-sa’e doben sira mundu tomak nian. Ha’u-nia belun-mane no belun-feto sira.

 

Imi hatene? Ha’u hanoin ha’u bele komprende didi’ak buat ne’ebé Don Bosco esprimenta bainhira nia hakerek ba foin-sa’e sira husi uma no oratóriu oioin, hodi dehan ba sira katak nia iha nostaljia ba sira, katak tebes duni, nia iha dezeju atu fila, atu horik ho sira. Ha’u bele asegura imi katak ha’u hakarak pasa festa furak Don Bosco nian iha fatin hotu no ida-idak ita-nia mundu salezianu nian no kumprimenta imi pesoalmente. No harohan hamutuk. No hamnasa, haksolok, hananu no dansa hanesan ita baibain halo nu’udar espresaun laran-kontente nian ne’ebé salezianu tebes. «Ita halo santidade konsiste iha haksolok liu», S. Domenico Savio dehan.

Maibé tanba ha’u labele marka prezensa iha fatin barak, liuhusi mensajen ida-ne’e ha’u dere imi-nia fuan nia odamatan no, ho delikadeza, ha’u husu lisensa atu fahe ho imi, foin-sa’e mane no feto sira, ha’u-nia votus di’ak liu ksolok no santidade nian ba imi ida-idak.

Bainhira imi selebra daudaun festa boot Don Bosco nian, ha’u sei iha Sierra Leone, iha kontinente afrikanu, ho ami-nia maluk salezianu sira ne’ebé hakarak mantein hela iha ne’ebá, iha momentu difisil liu epidemia ébola nian mós, hodi akompaña foin-sa’e mane no feto sira ne’ebé lakon sira-nia papá no mamá tan moras no oras-ne’e iha de’it ami nu’udar família. Bainhira ha’u iha sira-nia leet, ha’u sei dehan ba sira katak foin-sa’e sira prezensa saleziana mundu nian no ita-nia Família Saleziana tomak hanoin sira.

No ha’u, hodi hanoin imi no ba mensajen ida ne’ebé bele sai referénsia ba imi iha Don Bosco nia festa, ha’u hateten lia hirak ne’e: Ha’u-nia doben foin-sa’e sira, husik Jezús konkista imi!

Iha sintonia ho buat ne’ebé ha’u sujere ba Família Saleziana mundu nian, ha’u konvida imi atu husik Na’i “na’ok” imi-nia fuan. Ha’u-nia doben foin-sa’e sira, keta ta’uk atu Na’i sai parte importante liu imi-nia moris nian. Keta ta’uk atu nia tama kle’an ba beibeik iha imi-nia fuan, to’o halo imi labele moris tan lahó Nia.

Imi ruma karik husu mai ha’u tanba sá ha’u dehan buat ne’e.

Di’ak, uluknanai tanba ha’u hadomi imi no hakarak ba imi hotu, foin-sa’e mane no feto sira, moris ida nakonu no haksolok; iha fatin daruak, tanba ha’u hatene katak Don Bosco sei dehan ba imi, hanesan nia dehan ba ninia foin-sa’e sira Valdocco nian; no iha fatin datoluk, ida importante liu, tanba ne’e mak lialoos: bele iha serteza boot katak ho Jezús Kristu buat hotu iha ninia roman rasik.

Imi keta hanoin katak iha sosiedade, sidade eh fatin imi moris bá, iha ema barak mak halo konvite ida-ne’e ba imi. Ida-ne’e la tuir moda. Maibé, Maromak nia domin ba imi ida-idak, la’ós moda ida, maibé realidade ida ne’ebé to’o iha fatin hotu no ba ema hotu, se sira husik atu iha sira-nia fuan nalian ninia lian.

No iha-ne’e ho konkretu ha’u propoin ba imi:

✓ Ha’u propoin ba imi atu imi para liu buat ne’ebé imi bele atu rona imi-nia an, atu tama iha imi-nia mundu interiór rasik, atu rona ninia lian interiór.

✓ Ha’u propoin ba imi atu bainhira imi iha ona iha imi-nia mundu interiór, imi buka Maromak nia prezensa, ne’ebé Domin, Moris no nafatin Novidade: ha’u konvida imi atu halo esperiénsia atu deskobre nia no rekoñese nia.

✓ Ha’u propoin ba imi atu husik ema tulun imi iha buat ne’e sai ema ne’ebé buka Maromak atu aprende lee moris nu’udar Maromak nia bensan, hodi admira kona-ba ninia prezensa no ninia liman-fatin iha imi, no rekoñese nia nu’udar ida-ne’ebé tebes duni buka imi no moris iha imi.

✓ Ha’u propoin ba imi atu moris iha esperansa ne’ebé lori imi ba enkontru pesoál ho Jezús, enkontru ida ne’ebé nafatin atrai imi no fó solidés ba imi-nia moris sira.

✓ Ha’u propoin ba imi atu halo sai tasak amizade loos ho Jezús, amizade ne’ebé imi sei habiit iha Eukaristia no Rekonsiliasaun.

✓ Ha’u propoin ba imi atu husu ba Aman Maromak atu haraik ba imi Don Espíritu nian, ne’ebé sei halo imi hili atu sai ninian ho modu desizivu, halo parte ba sira ne’ebé tuir Jezús.

✓ Ha’u propoin ba imi atu aprende atu valoriza nafatin família, amizade, fraternidade no solidariedade ho ema ne’ebé terus.

✓ Ha’u propoin tan ba imi buat ruma di’ak liu: atu imi hakohak dezafiu atu aseita moris nu’udar don no nu’udar servisu, ne’ebé lahó dúvida sei halo imi di’ak liután no sei fó sentidu nakonu ba imi-nia moris.

No buat sira ne’e hotu to’o halo sai tasak imi-nia projetu moris nian, hodi halo sai realidade, Maromak nia mehi ba imi ida-idak, konxiente katak iha kazu hotu, oinsá de’it, mehi ida-ne’e sei sai nafatin garantia ksolok nian.

Ha’u nia foin-sa’e doben sira: ha’u remata hanesan ha’u hahú ha’u nia kumprimentu, hodi dezeja ba imi festa ida haksolok liu ita-nia Don Bosco doben nian. Atu Tulun-Na’in, Inan ne’ebé halo buat hotu ba nia, kontinua sai ba imi portu seguru, no atu Na’i Jezús kontinua konkista imi-nia fuan no imi-nia moris sira.

Hakohak ida ho domin loos nian.

Don Ángel Fernández Artime, sdb