Centro Formação João Paulo II iha Comoro no sentru treinamentu infórmatika iha Balide simu sertifikadu rejistrasaun nu’udar fornesedór formasaun profisionál

Dili – Secretaria de Estado para Política da Formação Profissional e Emprego (SEPFOPE) liuhusi Direcção Nacional da Formação Profissional (DNAFOP) ohin entrega sertifikadu rejistrasaun ba Fornesedór Formasaun Profissionál sira hamutuk 17.

Entre sira-ne’e inklui Centro de Formação Profissional João Paulo II iha Comoro no sentru treinamentu infórmatika iha Balide (irmán salesiana sira-nian). Ho sertfikadu ida-ne’e Governu rekoñese katak sentru formasaun João Paulo II tuir ona padraun rejistrasaun hodi bele implementa programa formasaun profisionál no empregu.

Centro Formação João Paulo II sei fornese skills no formasaun kona-ba “caffe espresso”. Períodu rejistrasaun nian husi fulan Janeiru 2013 to’o fulan Janeiru 2015. Durante tempu tinan rua ne’e nia laran Sentru Formasaun tenke prepara an atu bele hetan akreditasaun.

Diretór interino Direcção Nacional da Formação Profissional (DNAFOP), sr. Laurentino Casimiro iha ninia diskursu fó korajen atu Sentru sira ne’ebé hetan rekoñesimentu no sertifikasaun nu’udar fornesedór formasaun no empregu tenke buka atu fó ho formasaun kualidade di’ak. Nia husu atu sentru sira-ne’e buka hamriik mesak. Atu hamriik mesak, presiza buka meiu ruma atu bele sustenta an, liuhusi produtividade di’ak, hodi oferese formasaun ne’ebé empreza sira buka nune’e bele hadi’ak kapasidade empregadu sira-nian.

Ita agradese ba SEPFOPE ne’ebé fasilita prosesu ne’e iha tempu badak, tanba surat no rekerimentu sira hatama de’it iha fulan Outubru 2012. Centro de Formação Profissional João Paulo II harii kedas iha tinan 2007 liubá, no oferese tiha ona posibilidade ba treinamentu oioin liuliu ba estudante sira husi Escola Profissional Hotelaria e Turismo no empregadu sira iha área café espresso no bebida seluk nune’e mós produsaun hahán.