Dili – Formasaun kontínua mak knaar dahuluk Irmán FMA ida-idak nian nune’e mós nu’udar komunidade, basá dalan fidelidade nian harii iha moris loron ba loron to’o mate (kf Konst.100). Ne’e mak prioridade ida iha Inspetoria FMA TIN ne’ebé iha ona tinan 27, nafatin fó atensaun ba formasaun  permanente ba grupu oioin FMA nian tuir idade no tuir knaar. Ba tinan rua ona mak, bainhira hahú tinan foun nafatin  iha enkontru formativu konjuntu “Diretora-Ekónoma”.

Nune’e, iha loron 29 Janeiru 2016, iha  Uma Provinsiál FMA TIN, realiza enkontru formativu Diretora-Ekónoma ho tema “Diversidade hariku ita”.

Iha parte dahuluk enkontru nian, Irmán Alma Castagna aprezenta artigu sira Konstituisaun no Regulamentu nian ne’ebé ko’alia kona-ba knaar no kompeténsia espesífika diretora no ekónoma nian, ne’ebé la hanesan maibé hotu-hotu ba misaun ida. Diretora haree atu hotu-hotu la’o atu to’o ba projetu komún. Ekónoma ida-idak sei unifika atividade no obra hotu nia administrasaun, ne’ebé sei hala’o tuir Konstituisaun no Regulamentu sira. “Diretora tau matan ba aspetu relasionál, espírituál no umanu… Ekónoma tau matan ba ambiente, sasán….atu relasaun umana sai kompletu”. Hanesan Ir Vima Tallone  (Ekónoma jerál) dehan, “Diretora iha kbiit espirituál, no tanba ‘responsavel ikus’, kbiit atu deside. Ekónoma administra no jere”.

Hafoin Ir Alma fó mós pergunta rua  ba partilla iha grupu ki’ik sira nia laran. Husi partilla Irmán sira evidensia katak iha tinan hitu nia laran Inspetoria buras iha unifikasaun administrasaun, iha komuñaun soin nian no iha ekonomia sustentavel. Ne’e hotu tanba iha atensaun ba formasaun no akompañamentu ba komunidade sira no ba ekónoma lokál sira.

Buat ruma ne’ebé presiza habiit liután mak aspetu relasionál hanesan komunikasaun, respeitu resíproku no konxiénsia kona-ba importánsia misaun komún ne’ebé iha, la’ós enkargu ne’ebé obediénsia fó iha tempu temporáriu ida.

Iha parte daruak enkontru nian, Ekónoma provinsiál, Ir Aurora Ramos, aprezenta relatóriu finanseiru 2015, katak situasaun finanseira iha loron 31 Dezembru 2015. Inspetoria mak kadoras de’it atu osan liu no sai ba moris no obra sira komunidade nian. Maibé, kadoras ne’e iha tan hotu-hotu kontribui. Husi aprezentasaun gráfiku gastu osan nian, bele dehan katak “ekonomia iha funsaun ba misaun”. Aleinde ne’e, nia atualiza informasaun sira seluk kona-ba kontratu serbisu ho pesoál sira iha Estadu Timor-Leste,  no subliña “katak kritériu ne’ebé gia mak justisa, la’ós karidade”. Atu remata, nia foti fali Ir Vilma Tallone nia liafuan sira iha tinan 2015 hodi dehan katak, “Inspetoria iha futuru se iha unidade administrasaun”.