RV – Maromak nia mizerikórdia la’ós indiferente ba ema seluk nia terus no atua atu salva umanidade, Papa Francisco hanorin iha audiénsia jerál kuarta, 27, iha Prasa S. Pedro, Vaticano. Amu-Papa kontinua siklu katekeze nian kona-ba mizerikórdia tuir perspetiva bíblika.

Download

Papa Francisco fó hanoin katak, iha Sagrada Eskritura, mizerikórdia prezente iha istória tomak Maromak nia Povu Israel nia laran. Ezemplu ida mak bainhira Maromak rona povu ne’e nia hakilar iha moris-atan Ejitu nian. Maromak la indiferente ho sofrimentu ne’e; nune’e mós, Maromak nia mizerikórdia labele indiferente iha sira ne’ebé sente naha-todan hanehan nia oin.

“Maromak rona no intervein atu salva, hamosu ema ho kkbiit atu rona sira-ne’ebé terus nia halerik sira no serbisu ba ema sira ne’ebé sente todan hanehan sira”. Nu’udar mediadór libertasaun nian ba ninia povu, Maromak haruka Moisés no gia nia iha dalan ba liberdade. Moisés rasik, bainhira sei labarik, hetan salvasaun husi mate tan Maromak nia laran-sadia eh mizerikórdia iha bee sira mota Nilo nian, Amu-Papa fó hanoin, hafoin nia sai fali  mizerikórdia nia mediadór.

Iha Tinan Mizerikórdia nian, Papa Francisco esplika, ita hotu simu konvite atu halo serbisu sai mediadór/a sira mizerikórdia nian liuhusi obra sira mizerikórdia nian, hodi hakbesik ba ema seluk, fó kmaan ba sira ne’ebé terus no promove unidade.

Santu Padre mós fó hanoin katak mizerikórdia halo ema sai folin boot ba Maromak, rikusoin pesoál ida ne’ebé pertense ba nia. “Se ita Maromak nia oan sira no iha posibilidade atu soi liman-rohan ne’e – laran-di’ak no mizerikórdia –  iha konfrontu ho ema seluk, ita husu ba Na’i atu iha Tinan Mizerikórdia nian ida-ne’e ita mós halo obra sira mizerikórdia nian; ita loke ita-nia fuan atu to’o ba ema hotu ho obra sira mizerikórdia nian, liman-rohan mizerikórdia nian ne’ebé Maromak Aman iha mai ita”.