Dili – Inísiu tinan 2013, enkontru dahuluk formasaun nian ba irmán animadora sira komunidade nian no konselleira sira provínsia FMA-TIN hala’o ohin 21 Janeiru. Loron ne’e mak loron dedika ba espiritualidade saleziana. Irmán na’in 15 hamutuk ho provinsiál halo ofisina kona-ba estréia Reitór-Mor nian: “Hanesan Don Bosco edukadór, ita oferese Evanjellu ksolok nian ba foin-sa’e sira liuhusi pedagojia laran-di’ak nian”.

Iha nia estréia, Reitór-Mor aprezenta pespetiva tolu atu moderniza prinsípiu inspiradór sira no interpreta ideia boot baziku no orientasaun métodu ne’ebé Don Bosco elabora: Lansa filafali “sidadaun onestu no sarani di’ak”; fila fali ba foin-sa’e sira ho kualifikasuan boot liután no; eduka ho fuan.

Irmán partisipante sira fahe ba grupu tolu hodi reflete perspetiva ida-idak no hanoin oinsá bele aplika iha realidade Timor-Leste.

Pergunta ida atu reflete mak sé mak foin-sa’e sira-nia no sira-nia espetativa ohin loron. Irmán sira fahe katak joven sira hakarak moris di’ak hodi hetan buat hotu fasil no lalais maski dalan la loos: hakarak osan, hakarak estuda boot…. ba rai li’ur; hakarak modelu monster; hakarak ksolok fasil maski falsu. Joven sira la iha kompromisu konstante, komesa lakon valór fiar sarani.

Irmán sira mós fahe katak joven sira mós hein husi ita atu fó ba sira Jezús; fiél ba ita-nia vokasaun; akompaña sira iha vida espirituál no besik ba sira hodi fahe ho sira ksolok.

Atu bele hatán ba sira-nia hamrook kona-ba ksolok ita tenke lori sira ba hun ksolok nian, katak Jezús, nia mak Evanjellu Ksolok nian; evanjeliza no pratika sakramentu sira inisiasaun vida sarani; eduka ba dimensaun sosiál, gratuidade nia voluntariadu; eduka ho pedagojia laran-di’ak nian.

Maibé ita bele halo buat sira-ne’e se ita la’ós posu mamuk ida, fuan mamuk. Ita tenke iha Maromak nakonu iha ita-nia fuan, moris santidade, vida piedade nian no umanidade. Dala barak ita hanoin de’it mak misaun maibé ita haluha tiha Na’in misaun nian, Ida-ne’ebé haruka ita ba misaun no Ninia Mensajen. Iha tempu junioradu ita laran-manas ba vida orasaun, halo tiha votus perpétua ita sai malirin no mamuk. Pergunta boot ida: maski iha atensaun boot ba formasaun,tansá mak ita-nia moris hakiduk envezde ba oin, ita moris ho konviksaun ita-nia vokasaun ka lae?

Ikusnian, irmán Paola enfatiza fali knaar diretora sira komunidade nian. Nia husu atu irmán diretora sira hakle’an liután ita-nia estilu relasaun iha komunidade sira no ho foin-sa’e sira tuir espíritu família nian, sai akompañadora ba irmán foin-sa’e no entre ita atu buras liután iha buat ne’ebé ita hili ona iha ita-nia profisaun relijioza.