Baucau- Nakonu ho ksolok no sentidu gratidaun, Dioseze Baucau selebra aniversáriu epískopál Don Basílio nian ba dala XIX, iha loron 6 Janeiru. Festa hahú ho selebrasaun eukaristia ne’ebé prezide diretamente husi Don Basilio ho konselebrante amululik hamutuk na’in 32, Irmán sira husi kongregasaun oioin ne’ebé pertense ba dioseze Baucau, sarani sira husi parókia Vila Nova no katedrál, no mós OPIAM (Obras Pontifícia Infância e adolescência Missionária) husi parókia Vila Nova, Vila Antiga no mós husi parókia Laga.

Iha omilia Amu-Bispu hateten katak selebra aniversáriu ordenasaun epískopál halo nia relembra bainhira nia hahú sai Bispu iha Dioseze Baucau iha tinan 1997. Nia deklara katak haree ba realidade ohin loron hodi kompara ba passadu iha buat lubuk ida mak mudansa boot hanesan kuantidade amululik bainhira nia sai Bispu uituan de’it no kongregasaun relijioza sira mós tolu de’it iha Dioseza Baucau maibé ohin loron ita haree realidade iha mudansa boot. Buat hirak ne’e hatudu katak Maromak kontinua servisu iha ita, husu ita atu sai fiél hodi sai instrumentu Maromak nian nune’e husi ita grasa Maromak nian suli ba ema wain.

Iha okaziaun ida ne’e nia mós agradese ba amululik hotu-hotu no irmán sira hotu ne’ebé hola parte iha dioseze ida ne’e no mós agradese ba ema hotu ne’ebé kolabora hodi kontribui ba uma kreda durante tinan XIX nia laran. Maromak sei kontinua fó bensaun no grasa atu ita hamutuk tulun malu no suporta malu iha ita nia asaun pastorál.

Depoizde misa OPIAM sira simu Amu Bispu iha salaun dioseze nian ho inu/knananuk Infánsia nian. Hafoin kontinua ho mensajén husi Amu Arlindo, Pe. José Gonzaga no mós liafuan badak husi Amu-Bispu no  iha tempu hanesan Bispu fahe sasán ba ema kbiit-laek sira nu’udar asaun karitativa ne’ebé mai husi inisiativa OPIAM. Remata tiha kontinua kedas ho ko’a cake, ‘almoço de con-fraternização’ no ikus liu taka ho divertimentu (acara bebas).

Buat hotu la’o di’ak tanba labarik sira hala’o ho responsabilidade no entuziasmu knaar hotu ne’ebé entrega ba sira. labarik sira mak sai servente iha Amu-Bispu nia meza no mós iha meza konvidadu sira nian. Furak tebes tanba sira ativu no matan moris atu atende ema. Ema hotu apresia labarik sira tanba maski sei kiik sira hatudu duni sira nia responsabilidade.

Ita reza ba sira atu kontinua sai laran manas la’ós de’it iha okaziaun boot maibé liu-liu iha moris loron-loron nian iha sira nia família, eskola no sosiedade ne’ebé sira moris bá.

PARABÉNS BA AMU-BISPU NO DIOSEZE BAUCAU NE’EBÉ OHIN HALO TINAN XIX!

“Christiano inter vos, episcopus propter vos”.

(Albina do Carmo)