Vatican Insider – Bento XVI nomeia iha loron 16 Janeiru liubá, núnsiu apostóliku foun (embaixadór  Santa Sé nian] iha Timor-Leste Bispu norte-americano Joseph Marino, ho tinan 60, ne’ebé to’o oras ne’e reprezentante Amu-Papa nian iha Bangladesh.

Diplomata ne’e sei asume mós kargu nu’udar núnsiu iha Malásia no defaktu ne’e nunsiatura foun ida, no delegadu apostóliku iha Brunei. Delegadu apostóliku ida la reprezenta Amu-Papa iha territóriu ne’ebé nia ezerse nia funsaun sira no baibain hetan nomesaun ba nasaun sira ne’ebé la soi relasaun diplomátika ho Santa Sé.

 

 

D. Joseph Marino mak núnsiu apostóliku dahaat atu ezerse funsaun iha Timor-Leste no troka arsebispu Leopoldo Girelli iha kargu ne’e, ne’ebé okupa fatin ne’e husi kedas 2006.

Moris iha Birmingham, Alabama, Janeiru 1953, nia hetan lisensiatura iha filozofia no psikolojia husi University of Scranton (USA), no estudu teolójiku no bíbliku husi Universidade Gregoriana (Roma, 1975-80).

Depoizde halo servisu pastorál iha Birmingham (1980-84), nia tama iha akademia ba diplomata sira iha Roma iha1984, no manán doutoramentu iha Direitu Kanóniku husi Universidade Gregoriana. Nia hahú servisu diplomátiku Santa Sé nian iha 1988 no serví iha Filippinas (1988-91), Uruguay (1991-94), Nigeria (1994-97), no UK (2004-2008).

Nia servisu tinan ualu nu’udar Sekretáriu Estadu Vaticano nian (1997-2004), hodi halo relasaun ho nasaun sira hanesan Slovenia, Croatia, Serbia, Bosnia no Herzegovina, Montenegro, Albania no Moldova.

Amu-Papa Bento XVI nomeia nian nu’udar núnsiu ba Bangladesh iha 2008 no Kardeál Tauran, Prezidente Pontifísiu Konsellu ba Diálogu Interelijiozu ordena nia nu’udar bispu Birmingham nian.

Ho esperiénsia halo iha kontinente oioin, Arsebispu Marino sei ba hela iha Kuala Lumpur nu’udar Amu-Papa nia reprezentante no loke nunsiatura foun hodi serví mós Timor-Leste no Brunei.

Kreda Timor-Leste soi dioseze tolu (Baucau, Díli e Maliana) no Konferénsia Episkopál Timor-Leste harii iha loron 28 Marsu 2012.