RV – Papa Francisco selebra iha kuarta, 6 Janeiru, Solenidade Epifania Na’i nian. Iha omilia, Amu-Papa ko’alia kona-ba Kristu nia naroman ne’ebé leno umanidade tomak no Kreda iha niinia misaun evanjelizasuan nian ba povu sira.

Papa Francisco konvida sarani sira atu sai husi an rasik atu rekoñese Kristu nia naroman ne’ebé leno ezisténsia umana. Amu-Papa esplika katak Kreda la nabilan ho nia naroman rasik, maibé ho Jezús nian, roman loos, ho kapasidade atu leno ema nia moris.

Naroman ne’e nesesária atu ema ida-idak korresponde ho modu loos ba vokasaun ne’ebé nia simu. Haklaken Evanjellu, Amu-Papa enfatiza, la’ós opsaun ida, la’ós mós profisaun ida: Kreda misionária mak ida ne’ebé esprime ninia natureza rasik: simu roman husi Maromak no reflete Ninia naroman.

Husi Evanjellu, Papa Francisco destaka Ema Matenek sira nia sasin katak fini lialoos nian hetan iha fatin hotu, sira reprezenta ema sira, husi rai nia sikun haat, ne’ebé Maromak simu iha ninia uma.

“Iha Jezús nia prezensa, la iha ona divizaun ida rasa nian, lian nian no kultura nian: iha Kosok-Oan ne’e umanidade tomak hetan ninia unidade. No Kreda iha devér atu rekoñese no hamosu, ho forma klara ba beibeik, dezeju Maromak nian ne’ebé ema ida-idak lori iha ninia fuan”.

Husi fitun rihun ba rihun iha lalehan, Matenek-na’in sira tuir ida diferente, Papa Francisco esplika, fitun ida ne’ebé nabilan liu sira seluk. No fitun ne’e muda sira-nia moris no hatudu dalan atu tuir. Tuir Amu-Papa, ne’e mak lisaun boot ida ba tempu ohin nian.

“Ita simu bolun, liuliu iha tempu ida hanesan ita-nian, atu buka sinál sira ne’ebé Maromak oferese, konxiente katak nia husu ita-nia esforsu atu desifra no, nune’e, komprende Maromak nia vontade. Ita simu dezafiu atu bá Belém hasoru Kosok-Oan no nia Inan. Mai ita tuir roman ne’ebé Maromak oferese!”.

Iha Angelus Amu-Papa Francisco hateten katak Liurai Matenek sira no bibi-atan sira diferente liu entre sira maibé iha buat ruma komún entre sira: lalehan. “Bibi-atan no Liurai Matenek sira hanorin ita katak atu hasoru Jezús presiza foti matan ba lalehan, la taka iha an rasik, maibé soi fuan no neon nakloke ba Maromak nia orizonte ne’ebé nafatin surpriende ita”.