Komunidade edukativa Sentru Treinamentu Madalena Morano Fuiloro haksolok ho graduasaun ba estudante na’in 53

 

Fuiloro – “Centro Treinamento Profissional Madre Morano”, ohin 19 Janeiru 2013, haksolok iha festa tanba ohin hala’o graduasaun ba estudante feto-raan na’in 53: 51 kursu administrasaun-informátika no na’in 2 kursu kostura nian.Sira konsege remata kursu hodi simu sertifikadu II ne’ebé INDMO rasik hasai, ho standard/padraun nasionál no internasionál.

 

Marka prezensa iha enkontru ne’e membru Governu balun hanesan Sr. Albano Salem, Diretór Nasionál Formasaun Profisionál SEPFOPE nian, Sr. Filomeno (defensór Públiku), Sra. Regina de Jesus husi Ministériu Jusitsa, Sr. Crisógono Costa (Administrasaun Finansas Justisa nian), Sr. Egídio husi Unidade Jurídika Ministériu Solidariedade Sosiál nian.

 

Selebrasaun fahe ba parte tolu: Eukaristia, Simu sertifikadu, almosu. Durante misa, selebra husi padre Carlos sdb  nia hakle’an tema agradesimentu nian, hodi konvida mós graduanda sira atu haburas liután sira-nia moris liuhusi buat ne’ebé sira aprende ona no simu liután buat ne’ebé sira hein.

Durante serimónia simu sertifikadu irmán Lucia fó bemvinda ba konvidadu hotu hodi agradese ba kolaborasaun no apoiu materiál, morál no espirituál durante tinan ida-ne’e husi parte hotu: Governu, salezianu sira, família, edukadór no inan-aman sira. Nia entrega fali oan feto sira ba inan-aman hodi husu sira atu kontinua akompaña sira .

Sr. Albano Salem iha ninia diskursu nia fahe katak iha sentru trenamentu 13 mak hetan akreditasaun husi governu, inklui Sentru Treinamentu Madalena Morano, Fuiloro. Nia husu, atu keta kontente de’it ho akreditasaun maibé atu kontinua dezenvolve iha área treinadór sira-nian, fasilidade nian, konteúdu nian. Nia dehan, nu’udar sentru akreditadu, governu sei kontinua fó suporte finanseiru, tuir standar ne’ebé estabelese ona: osan $375 ba kada estudante atu hodi selu ba profesór/treinadór, ba manutensaun, ba prosesu aprendijazen…) Nia hein atu kontinua dezenvolve faze tuir mai katak “formasaun iha servisu fatin”/on the job training.

Tuir ir. Inés, koordenadora Sentru nian,kursu iha Sentru Formasaun profisionál hahú kedas husi  tinan 2002.

• Aluna sira ne’ebé halo graduadusaun  iha tinan 2003  hamutuk  = 41 ; 19 kursu informátika, kustura  22.
• Tinan 2004 aluna ne’ebé halo graduaduasaun hamutuk = 33;  19 kursu informátika, 14 kustura
• Tinan 2005 aluna ne’ebé halo graduadusaun  hamutuk =45;  24 kursu informátika, 21 kustura
• Tinan 2006 aluna ne’ebé halo graduaduasaun hamutuk =42;  25 kursu informátika, 17 kustura
• Tinan 2007 aluna ne’ebé halo graduaduasaun hamutuk =75;  51 kursu informátika, 24 kustura
• Tinan 2008 aluna ne’ebé halo graduaduasaun hamutuk =59;  51 kursu informátika, 8 kustura
• Tinan 2009 aluna ne’ebé halo graduaduasaun hamutuk =67;  52 kursu informátika, 15 kustura
• Tinan 2010 aluna ne’ebé halo graduadusaun hamutuk =57;  48 kursu informátika, 9 kustura
• Tinan 2011 aluna ne’ebé halo graduasaun hamutuk =61;  52 kursu informátika, 9 kustura

Hafoin iha mós liafuan agradesimentu husi inan-aman ne’ebé Sr. Marcos mak reprezenta, husi menina sira no husi irmán Jacinta ne’ebé reprezenta ir Paola, provinsiál FMA sira-nian, hodi mós fahe medalla Maria Auxiliadora ba graduanda sira, ne’ebé oras ne’e sai antiga aluna FMA ona. Liafuan ikus nian ba antiga aluna sira mak kontinua la’o ba oin hodi hanoin katak “la iha vitória lahó luta, la iha luta lahó sakrifísiu la iha sakrifísiu lahó domin”. FMA nia uma nia odamatan sei nakloke nafatin ba imi hotu.