BAUCAU-Ho ksolok Irmán sira hamutuk ho labarik sira husi oratório Diwake, Teulale, grupu Infansia misionária katedrál, grupu Infansia husi Vila-Nova, husi PMY Buruma, reprezentante husi ADMA, grupu Laura & Mazzarello, Akólitus, no mós inan-aman balun husi labarik sira nian haksolok hodi hato’o sira nia boas festas natal nian ba Amu-Bispu,  Liuhusi Jogos buka rikusoin (treasure hunting) ho tema Natal no Tinan Jubileu Mizerikórdia, ne’ebe anima husi madre Jacinta Gusmão hafoin kontinua kedas ho drama, dansa no kántiku husi grupu hotu-hotu ne’ebe partisipa.

Iha nia lia-menon Amu-Bispu hateten katak labarik sira mak sai riku soin kreda nian nune’e husu atu labarik sira kontinua sai sasin iha sosiedade tuir sira nia motto katak “Labarik tulun labarik”. Hodi kontribui iha kreda nia misaun apostólika. Entretantu irmán Jacinta hafanu labarik sira atu pratika obra de mizerikórdia parte espirituál no korporál. Diretor Missio Dioseze Baucau, Pe. José Gonzaga, hahu hodi konta istória oinsa Infánsia Misionária hahú ba inan- aman no ba ema hotu ne’ebe prezente tanba dala barak ema lahatene. Nia hateten katak OPIAM (Obras Pontífícia Infansia no Adolosxénsia Misionária) mak sai nu’udar mahon ba grupu kategoriál labarik no joven sira nian iha Kreda. Nune’e grupu ida-ida la la’o ketak maibé hamutuk nu’udar forsa boot ida ne’ebé bele kontribui iha misaun Kreda nian.

Ambiente nakonu ho ksolok no amizade no buat hotu la’o di’ak tanba kolaborasaun maka’as husi labarik sira nia inan-aman no mós husi labarik sira rasik ne’ebé fó-an atu servisu hodi halo preparasaun to’o festa ne’e remata. Maski sira sei ki’ik maibé hatudu duni sira nia responsabilidade iha knar ki’ik ne’ebe entrega ba sira.

DALA IDA TAN NATAL KMANEK MAI ITA HOTU!

(Albina do Carmo)