RV – Iha katekeze kuarta, 16, Amu-Papa Bento XVI konsentra ninia hanorin hale’u mistériu revelasaun Maromak nian ba ema sira. Revelasaun ne’e akontese ho modu kompletu iha Jezús, Verbu, Maromak nia Liafuan, ne’ebé mai horik iha ema nia leet.

“Iha Jezús Nazaré, Maromak vizita duni nia povu, vizita umanidade ho modu ida ne’ebé hakat liu espetativa hotu: nia haruka nia Oan-Mane Mesak; Maromak rasik halo an ba mane”, Amu-Papa hateten.

[Asesu kópia ho lia-portugés]

 

Bento XVI afirma katak iha ita hotu iha hakaran atu haree Maromak nia futar oin, inklui ateu sira. Babukak inkonxiente karik kona-ba Maromak, maibé ema hotu buka. Tuir Amu-Papa, babukak ne’e remata bainhira ita hasoru ona Jezús, haree ona nia futar oin.

“Hakaran ida-ne’e bele realiza hodu tuir Jezús”. Buat ne’ebé importante mak ita tuir Kristu la’ós de’it iha momentu ita iha nesesidade no bainhira ita horik iha espasu ida ita-nia okupasaun loroloron nian, maibé ho ita-nia moris tomak.

Santu-Padre enfatiza katak ezisténsia umana hotu tenke orienta ba enkontru ho Jezús Kristu, ba domin ba Nia. Enkontru ida-ne’e bele akontese ho forma rua: liuhusi domin ba maluk sira – ne’ebé lori ema atu rekoñese Jezús nia oin iha ema kiak, ema fraku, ida-ne’ebé terus – no iha Eukaristia. ” Eukaristia mak eskola boot iha ne’ebé ita aprende atu haree Maromak nia futar oin, ita tama iha relasionamentu íntimu ho Nia”, afirma Amu-Papa.

Bento XVI taka katekeze hodi subliña katak sarani sira tenke la’o iha rai ne’e ho espetativa konstante atu haree Na’i nia futar Oin, ne’ebé sei akontese loloos iha Maromak nia Reinu, katak iha Lalehan.