Dili – Irmán na’in 8 hahú ohin sira-nia kursu bienál ba irmán juniora sira: na’in neen husi FMA, ida husi Concepcionista no ida husi Vitoriana sira.

Kursu ne’e hatuur an nu’udar formasaun kontínua tuir perspetiva dinámika dezenvolvimentu nian, iha ne’ebé ema kontinua nia formasaun iha moris tomak. Formasaun ba irmán junior sira iha nu’udar objetivu:

 

• Hametin koñesimentu báziku sira ne’ebé irmán simu iha eskola sekundária;
• Favorese koñesimentu kona-ba irmán nia an rasik no dezenvolviemntu kapasidade sira nian;
• Hakle’an matéria kulturál, antropolójika no pedagójika ne’ebé tulun atu interpreta realidade ohin loron nian no fó kualidade ba misaun apostólika.

Kursu ne’e kontinuasaun tinan 2012 nian.. Programa tinan ne’e nian inklui matéria sira hanesan: Antropolojia filozófika, psikolojia vida konsagrada nian, teoria no métodu ensinu-aprendijazen nian, istória-jeografia ho mós dinámika grupu nian.

Oráriu ba kursu hahú husi sesta loraik tuku 4 to’o tuku 5.45  no kontinua iha loron sábadu husi tuku 8 dadeer to’o tuku 3 loraik, fulan ida dala rua, katak, iha semana daruak no semana dahaat.