Dili – Ba tinan ruma ona iha Institutu, hahú husi Projetu Formasaun (2000), husu atu servisu autoridade no vida komunidade nian soi karakterístika sira estilu koordenasaun nian. Atu hala’o ida-ne’e presiza favorese governu ida halo iha lójika animasaun nian. Ne’e mak modalidade ida ne’ebé favorese envolvimentu ema hotu nian no komunidade sira atu halo karizma sai fekundu (kf. PF p. 131).

Irmán sira ne’ebé obediénsia husu atu governa no anima presiza kontinua forma an no forma hamutuk atu hakle’an no implementa estilu koordenasuan ba komuñaun. Nune’e, iha loron 9-10 Dezembru, Irmán Konselleira sira no Diretora hetan formasaun kona-ba tema sira hanesan “Estilu ida animasaun nian: koordenasaun ba komuñaun” (Konselleira sira) no “Diretora iha Inspetoria nia moris” (Diretora sira).

Ir Alma Castagna, Inspetora FMA Timor-Indonesia, fasilita formasaun ne’e hodi fahe reflesaun sira husi Ir Vigária Jerál, Chiara Cazzuola, ne’ebé nia simu iha formasaun ba neo-inspetora sira.

Kona-ba knaar Konsellu nian, nia la’ós órgaun ida governu nian, maibé kolaborasaun ba governu, konsultasaun nian no partisipasaun, liuhusi paresér no konsensu ne’ebé tenke fó.  Atu halo ida-ne’e presiza fó espasu ba raronak, dixernimentu, esprime ho sinseridade no liberdade…iha babukak Maromak nia vontade.

Depoizde Konselleira inspetoriál sira, animadora sira komunidade nian mak interlokutora dahuluk Inspetora nian atu vida bele buras iha Inspetoria. Diretora sira mak kadeli ida iha sirkularidade animasaun inspetoriál. Basá, defaktu iha komunidade lokál mak karizma hola isin, no iha nia mak FMA ida-idak realiza ninia vokasaun no misaun nu’udar FMA.

Prioridade ida ne’e presiza kondisaun ruma

Kondisaun sira atu vida buras mak fó tempu ba enkontru; hanoin ba itineráriu formativu ida; halo avaliasaun…oinsá la’o bá oin iha komunidade. Diretora mak responsavel dahuluk ba obra sira iha fidelidade ba karizma, maibé hamutuk ho Irmán sira. Knaar espesísiku diretora nian mak: formasaun irmán sira-nian iha esperiénsia moris loroloron nian.

Atitude sira ne’ebé Diretora tenke iha: dosilidade ba Espíritu Santu; atensaun ba Irmán ida-idak; diponibilidade uluknanai iha uma-laran, molok ba li’ur; prudénsia; kapasidade atu hala’o lialoos iha karidade (ekilíbriu); sai maluk dalan nian maski tenke liuhusi Jezús nia mistériu paskál.

Kritériu sira atu hili no forma Irmán sira ne’ebé iha knaar formativu eh animasaun nian mak atitude ba interioridade, kapasidade atu horik ho Jezús, sente Ninia prezensa iha tempu susar nian…; buka no rona, no ida-ne’e presiza tempu, presiza disponibilidade atu buka hamutuk, keta husik Irmán sira buka mesak, la impoin solusaun; kapasidade relasionál; disponibilidade, konxiénsia iha ksolok kona-ba identidade rasik FMA nian…

Pergunta ruma gia Irmán diretora sira-nia reflesaun hanesan tuirmai:

• Bazeia ba ó-nia esperiénsia, aspetu sira ne’ebé susar liu atu moris iha esperiénsia loroloron nian nu’udar animadora komunidade nian?
• Kondisaun sá de’it importante liu no hilin konkretu atu bele tulun manán difikuldade ne’ebé oras-ne’e ita enfrenta?
• Sujestaun ruma…

Iha partilla Irmán sira fahe sira-nia difikuldade iha knaar animasaun no identifika solusaun ruma…Maibé buat ne’ebé importante liu mak FMA hotu hakle’an Konstituisaun renovada ne’e ho modu persoál, vitál, assimila, inkarna atu bele haburas ninia vida konsagrada, hanesan Maromak nia mehi mai ita ida-idak.