Tinan ida tan grasa nian Kreda haraik mai ita ho proklamasaun Jubileu Mizerikórdia nian. Amu-Papa konvida ita atu selebra momentu ne’e liuhusi dalan kontemplasaun no empeñu pesoál no komunitáriu: ita mós simu bolun atu hatudu oin mizerikórdia nian, liuhusi ita-nia jestu, ita-nia hilin sira.

SAIDA MAK JUBILEU? NO TANBA SÁ ESTRAORDINÁRIU?

Liafuan Jubileu mai husi lia-ebraiku ‘Yobel’ ne’ebé indika rusa nia dikur uza atu hahú tempu espesiál ida, eventu ne’ebé Na’i ko’alia ba Moisés iha kapítulu 25 Levítico nian. Ne’e mak tinan ida iha-ne’ebé rai tenke deskansa, no halakon tusan hotu no husik livre atan sira: nesesáriu atu moris filafali nu’udar maun-alin. Jubileu ebraiku realiza tinan 50 dala ida, tuir sira-nia kalendáriu.
Jubileu sarani dahuluk Papa Bonifácio VIII (1230-1303) mak haklaken iha tinan 1300 ho objetivu atu propoin filafali Kreda nia papél dispensadora salvasaun nian, hodi fó induljénsia plenária ba ema hotu ne’ebé halo peregrinasaun ba Roma atu harohan iha Apóstolu sira nia rate no simu Kristu nia isin. Distánsia entre Jubileu ordináriu no seluk, foufoun estabelese ba tinan 100 dala ida; maibé Amu-Papa Clemente VI (1291-1352)muda tinan 50 iha 1350, enkuantu Papa Paulo II (1417-1471) iha 1470 hatuun ba tinan 25. Jubileu sira ne’ebé selebra ona to’o ohin loron hamutuk 121: ordináriu 26 no estraordináriu 95. Jubileu estraordináriu ikus selebra iha 1983, iha aniversáriu da-1950 Jezús Kristu nia paixaun, mate no moris-hi’as nian; Jubileu ordináriu ikus iha tinan 2000.
Ba Kreda, Jubileu mak tinan ida grasa nian, iha-ne’ebé ita simu bolun atu moris ksolok vida sarani nian. Liafuan latin jubilum, husi-ne’ebé mai liafuan “júbilo” (port.) signifika ksolok. Ita simu bolun atu haksolok basá vida sarani mak bolun ida ba ksolok. Sentimentu ne’e mai mós husi kasu-salan no kastigu sira, tanba induljénsia plenária.
Jubileu estraordináriu mizerikórdia nian mak ida dahuluk atu iha temátika presiza.
Jubileu ne’e sei loke iha loron 8 Dezembru 2015, iha konkordánsia ho aniversáriu taka Konsíliu Vaticano II ba da-50, ho abertura Porta Santa (Odamatan santu)Bazílika S. Pedro iha Roma, no domingu tuirmai dioseze ida-idak sei loke ninia porta santa rasik.
Bula proklamasaun Jubileu nian, Misericordiae Vultus, ne’ebé Papa Francisco entrega iha loron 11 Abríl 2015, subliña nesesidade atu proklama tinan santu estraordináriu ida tanba, hodi uza Amu-Papa nia liafuan, «Kreda, iha momentu mudansa epokál boboot ida-ne’e, simu bolun atu oferese ho forsa liután sinál sira ninia prezensa no ninia prosimidade ba Maromak». Amu-Papa aforma mós katak ne’e mak «tempu mizerikórdia nian. Tempu favoravel atu kura kanek sira, atu keta kolen atu hasoru ema sira ne’ebé hein atu haree no kona ho liman sinál sira Maromak nia prosimidade nian, atu oferese ba ema hotu, ba ema hotu – nia repete – dalan perdaun no rekonsiliasaun nian». Abertura ba ema ida-idak nia moris no kapasidade atu dialoga ho mundu, objetivu Konsíliu Vaticano II nian, sai dezafiu atuál liu.
Jubileu sei taka iha 20 Novembru 2016, iha Solenidade Kristu Liurai Lalehan no Rai nian.

PORTA SANTA

Tinan Jubilár iha inísiu ho abertura Porta Santa nian. Amu-Papa halo ida-ne’e iha Bazílika S. Pedro nian hafoin repete iha bazílika boot sira Roma nian: “San Giovanni in Laterano”, “San Paolo fuori le mura” no “Santa Maria Maggiore”. Ho jestu ne’e, Kreda tomak loke luan ninia odamatan sira atu haklaken ba ema hotu katak loke dadaun tempu ida iha-ne’ebé ita bele halo dalan estraordináriu ida atu to’o ba Kristu.
Maibé liu eh tama husi Porta Santa iha signifikadu ida boot liután tanba Kristu mak odamatan, hanesan ita lee iha evanjellu João nian: «Ha’u mak odamatan: se ema ida liu husi ha’u nia sei hetan salvasaun» (Jo 10,9a).
Ida-ne’e signifika katak ksolok ne’ebé ita simu bolun atu deskobre no moris iha tinan jubilár bele alkansa de’it liuhusi Nia, hodi tama liuhusi Kristu, iha enkontru sakramentál, hodi inkarna ninia hanorin sira, hodi deskobre novidade ne’ebé Nia lori iha ita-nia moris. Liuhusi Kristu ita to’o ba ksolok ne’ebé hetan iha Kreda no iha mundu.
Iha tinan ida-ne’e ne’ebé tau importánsia atu deskobre “Aman nia oin laran-sadia nian” (rosto misericordioso do Pai), Amu-Papa konvida atu loke «Odamatan sira mizerikórdia nian» iha dioseze ida-idak no iha fatin ida-idak ne’ebé iha signifikadu importante ida ba moris espirituál territóriu ida nian. Iha bula Amu-Paa espesifika katak, ema ne’ebé hakat liu nia, «bele esperimenta Maromak nia domin ne’ebé konsola, perdua no fó esperansa» (Misericordiae vultus 3).

SÉ MAK PEREGRINU

Iha tinan ida-ne’e iha-ne’ebé, ita-nia Institutu husu atu ita sai ho foin-sa’e sira misionária esperansa no ksolok nian, ita-nia dalan sai mós ida peregrina/u “mizerikórdia” nian, hodi halo tuir Papa Francisco nia lia-menon sira.
Durante Tinan Santu ita hotu simu konvite atu la’o ba Odamatan Santu/Porta Santa: ita mak peregrina/u sira. Peregrinu mak ema ne’ebé la’o ba hasoru meta fízika ida, maibé liuliu ida interiór no espirituál no atu alkansa ida-ne’e nia foti atitude ida buka nian prontu atu enfrenta difikuldade sira fízika no espirituál. Iha tinan Santu ida-ne’e Amu-Papa konvida ita atu sai peregrinu mizerikórdia nian, simu bolun atu uluknanai «keta julga no kondena, katak hatene haree buat ne’ebé di’ak iha ema ida-idak.
[…] Jezús husu mós atu perdua no fó; sai instrumentu perdaun nian, basá ita mak uluknanai simu perdaun husi Maromak» (Misericordiae vultus 14).
Peregrinu mak figura ida ne’ebé iha sékulu istória nian no iha tempu hasoru transformasaun barak: husi tempu mediuevu nian, liuhusi lurón antigu romanu iha Europa tomak iha ema barak la’o bá Roma, no bele rekoñese ema sira ne’e liuhusi sira-nia hatais ho sandália nakonu ho rai-rahun, moxila boot, ai-tonka ida atu tulun la’o, xapeu luan atu proteje husi loron, bee no sinál distintivu peregrinu nian mak ramís. Símbolu ne’e ita hetan iha kreda barak Europa nian, liuliu kreda ne’ebé sai etapa intermédia peregrinasaun ida-nian.
Ohin-loron peregrinu sira la enfrenta ona viajen ne’ebé dura fulan barak, nune’e fundamentál atu tau matan ba aspetu espirituál; viajen la halo ona ho ain no halo ho meiu transporte foun sira, maibé hatais mantein ho estilu ida simples, kómodu no adapta ba meta ne’ebé tenke to’o. La halo kilómetru atus ba atus ho ain maibé parte ida viajen nian halo ho ain, maski metru ruma ikus de’it, husu sapatu sira ne’ebé kómodu. Moxila sai objetu fundamentál viajen nian, atu tau buat hotu ne’ebé bele serve atu akompaña ita iha peregrinasaun ida-ne’e hanesan hahán, krús ida, bíblia, xapeu ida.

INDULJÉNSIA

Buat ida ne’ebé karakteriza tinan jubilár ida-idak mak posibilidade atu simu induljénsia. Amu-Papa hili atu esplika ninia signifikadu ho liafuan simples no klaru:
«Maski iha perduan, iha ita-nia moris ita lori kontradisaun sira nu’udar konsekuénsia ita-nia salan sira-nian. Iha sakramentu Rekonsiliasaun Maromak perdua salan sira, ne’ebé kansela tebes duni; maski nune’e, marka negativa ne’ebé salan husik iha ita-nia komportamentu sira no ita-nia hanoin sira hela nafatin. Maibé, Maromak nia mizerikórdia forte liufali ida-ne’e. Nia sai induljénsia Aman nian ne’ebé liuhusi Kristu nia Kaben (Kreda) to’o ba maksalak ne’ebé hetan perdaun no liberta nia husi restu hotu konsekuénsia salan nian, hodi kapasita nia atu atua ho karidade, atu buras iha domin duké monu fali iha salan» (Misericordiae vultus, 22).
Simu induljénsia mak, loos duni, abertura ida loke mai ita iha tinan ida-ne’e, atu alkansa ksolok nakonu.
Simu induljénsia husu jestu no asaun sira, ne’ebé se lee ho superfisialidade bele halo ema hanoin hanesan fórmula májika ida, maibé loloos iha signifikadu kle’an liu.

•  Iha estadu grasa nian: katak hili ho konxiénsia no liberdade atu hakribi salan hotu atu loke an ba moris foun.
• Selebrasaun sakramentu Rekonsiliasaun no Eukaristia nian: selebrasaun ne’e hatudu ita-nia hola-parte/pertensa ba Kristu no ita-nia hola-parte ba Kreda nia moris.
• Orasaun ba Amu-Papa nia intensaun sira, nu’udar sasin komuñaun nian ho Kreda tomak.
• Hahalok karidade nian ne’ebé esprime konversaun fuan nian nu’udar rezultadu sakramentu sira-nian. Peregrinasaun ba Bazílika jubilár ida, ho pasajen liuhusi “Odamatan mizerikórdia nian” mak hahalok ida karidade nian.

(FMATIN Tatoli Outubru-Dezembru 2015)