Iha osidente husi sékulu V doutrina salan orijinál no Imakulada Konseisaun Maria nian la’o hamutuk tanba razaun rua: universalidade salan nian no universalidade redensaun nian (se la iha  salan la iha redensaun). Sira buka solusaun. Eadmero (s. XI) no Duns Scoto (sék. XIII) mai ho ideia xave atu rezolve problemátika ne’e: Maria hetan santifikasaun molok moris, Maromak prezerva nia atu monu iha salan orijinál tan Kristu, mak tezi ne’ebé manán. Loos duni, Maria hetan redensaun, maibé ho modu sublime liu.

1. Revizaun lais istória nian hodi sura ho pulmaun[1] rua Kreda nian.

Definisaun dogma  Imakulada Konseisaun iha istória naruk no difisil, basá to’o metade sékulu XIX, liutiha kontrovérsia manas sira iha mundu latinu, mak foin define. Padre gregu no orientál sira la iha diskusaun sira kona-ba tema ne’e. Sira sempre fiar katak Maria mak santa-tomak. Padre gregu sira husi sékulu lima dahuluk la koñese problema salan orijinál nian hanesan oinsá argumentu ne’e dezenvolve iha teolojia latina.  Konserteza sira ko’alia kona-ba konsekuénsia Adão nia sala nian, kona-ba desgrasa sira no buat aat sira ne’ebé lori ba umanidade tomak, basá, natón de’it hateke ba ita-nia sorisorin atu haree katak ita la moris iha estadu Paraízu nian.

Buat ne’ebé diskute iha sékulu dahuluk sira mak  Maria iha estadu livre husi salan pesoál tomak no husi falta morál eh lae. Nune’e, sira ko’alia kona-ba khatarsis (purifikasaun) Maria nian iha momentu anunsiasaun nu’udar preparasaun atu simu iha nia knotak Maromak nia Oan. Liufali purifikasaun eh libertasaun husi salan, tenke entende ida-ne’e nu’udar santifikasaun hodi obra Espíritu Santu nian. Husi sékulu V manán teze kona-ba Maria nia santidade perfeita. Reflesaun orientál espresa realidade hanesan ho buat ne’ebé osidente ho liafuan seluk dehan katak Maria mak “santa-tomak, imakulada, Espíritu Santu mak plasma, kriasaun foun”.

Iha teolojia latina, liuliu husi S. Agostinho (+430) doutrina kona-ba salan orijinál sai jeneralizada, katak, ita hotu kona Adão nia salan ne’ebé daet ita husi jerasaun. Teoria ida-ne’e kria difikuldade boot ba teolojia[2], maibé iha diskusaun kona-ba salan orijinál entre Agostinho no Pelágio, S. Agostinho dehan katak Maria la tama: “menus ba santa Virjen Maria, basá, tan onra ne’ebé tenke fó ba Na’i, bainhira ko’alia kona-ba salan sira, ha’u lakohi absolutamente halo kestaun ida (tanba ita hatene katak haraik tiha ona ba nia grasa barak atu manán salan husi parte hotu, basá nia merese ko’us no tuur ahi hanesan ita haree katak nia la iha salan ida); ho esesaun, ha’u dehan, ba Virjen ida-ne’e …”[3].

Kuriozu katak husi inísu diskusaun sira kona-ba temátika salan orijinál nian iha nia relasaun ho Maria, povu simples nia fiar reajen atu defende Maria santa-tomak, basá ida-ne’e mak intuisaun ida ne’ebé mantein konstantemente iha istória tomak.

Pontu nukleár reflesaun nian kona-ba Imakulada Konseisaun Maria nian mak tranzmisaun iha Tradisaun Kreda nian, intuisaun no sentimentu katak Maria mak santa-tomak no nafatin nakonu ho grasa. Nakonu ho grasa mak naran Anju fó ba nia iha anunsiasaun nu’udar S. Lucas haktuir. Ida-ne’e mak pontu partida nian ba konviksaun ne’e: kumprimentu “nakonu, hakonu ho grasa” kontinua iha istória.

Iha osidente husi sékulu V doutrina salan orijinál no Imakulada Konseisaun Maria nian la’o hamutuk tanba razaun rua: universalidade salan nian no universalidade redensaun nian (se la iha  salan la iha redensaun). Sira buka solusaun. Eadmero (s. XI) no Duns Scoto (sék. XIII) mai ho ideia xave atu rezolve problemátika ne’e: Maria hetan santifikasaun molok moris, Maromak prezerva nia atu monu iha salan orijinál tan Kristu, mak tezi ne’ebé manán. Loos duni, Maria hetan redensaun, maibé ho modu sublime liu.

Ita hatene mosu kontrovérsia medievál entre franciscano sira[4] no domenicano sira, ida ikus ne’e kontráriu ba doutrina Imakulada Konseisaun nian, ikus mai mosu mós jezuita sira ne’ebé afavór, nst. Iha España imposivel sustenta husi púlpitu opiniaun kontrária ba Imakulada basá povu reajen iha pregadór sira nia oin ho murmúriu, hakilar no to’o violénsia mós. Fiar populár ne’e hetan espresaun iha sékulu XVII ho instituisaun arkikonfraria oioin ho títulu Imakulada Konseisaun, ho orasaun sira hodi aumenta ladaiña invokasaun “sancta virgo preservata” (Paris 1586), ho dedikasaun kapela no altár sira no ho espresaun artístika sura-laek, hanesan tela ruanulu-resin-lima Murillo nian (+1685).

Movimentu promosionál ida lahó presedente hahú iha sékulu XVII ho votu raan nian. Universidade Granada nian mak primeira atu halo ida-ne’e. Jestu ne’e habelar iha universidade española sira seluk, italiana sira, orden relijioza sira, arkikonfraria sira no fiél/sarani sira rasik.

Kona-ba festa litúrjika  tenke dehan katak selebra husi kedas sékulu IX iha Itália meridionál no iha Inglaterra iha sékulu XI. Nia hahú difunde no iha 1708 Clemente XI habelar ba Igreja universál[5].

2. Dogma Imakulada Konseisaun Maria nian

Papa Pio IX mak proklama dogma ho bula Ineffabilis Deus iha loron 8 Dezembru 1854, buat ne’ebé hatodan definisaun dogma nian, mak hanesan hateten ona,  sensus fidei, sentidu komunitáriu Povu sarani nia fiar ne’ebé intui lialoos boboot obra Espíritu Santu nian, sarak ita simu unsaun Espíritu nian husi Batizmu no Nia mak gia ita ba lialoos nakonu bainhira ita buka ho sinseridade no iha dosilidade ba ninia movimentu sira. Bainhira Maromak nia Povu espresa sentimentu hanesan iha matéria ida fiar nian, nia sai argumentu todan ida, ne’ebé Majistériu tenke konsidera. Ida-ne’e mós mak akontese mós ho dogma Asunsaun nian.

Dogma ne’e iha fundamentu iha Eskritura, maibé la iha argumentu konkluzivu. Sitasaun bíblika sira ne’ebé bele tulun mak:

Gén 3,15: “ha’u sei tau inimizade entre ó no feto, entre ó-nia dexendénsia no ninia dexendénsia; nia sei sama ó-nia ulun, no ó sei tata ninia ain-tuban.”

 no Lucas 1,28: “Haksolok bá, nakonu ho grasa”(kejaritomene).

Testu sira-ne’e la iha sentidu ida tanba ninia liafuan de’it, maibé tanba ninia relasaun íntima ho Tradisaun no Majistériu.

Ba definisaun dogmátika konverje:

• Trento iha sentidu katak nia trata tema salan orijinál, nia la tama iha diskusaun kona-ba Maria, tau sees tiha ba sorin.
• Amu-Papa sira nia pozisaun ne’ebé afavór (Pio VII, Leão XIII, Gregório XVI),
• Dominicano sira-nia mudansa, ne’ebé iha istória presedente mantein kontra Imakulada Konseisaun Maria nian.
• no Pio IX ne’ebé nomeia komisaun pontifísia ida molok, iha 1848, atu estuda kestaun ne’e. Membru sanulu-resin-hitu (kontra na’in tolu) deklara favoravel ba definisaun. Nia mós halo konsulta ida ba episkopadu. Husi bispu na’in 603, na’in 56 de’it mak manifesta kontráriu[6].

Bula ko’alia kona-ba PREVIZAUN & PREZERVASAUN, katak, REDENSAUN PREVENTIVA: Maria nia redensaun halo ho antesedénsia no hodi tau iha konta vokasaun no maternidade divina .  

3. Signifikadu dogma Imakulada Konseisaun Maria nian.

Vaticano II subliña katak mistériu Maria nian tenke aprezenta ohin hodi koloka iha ninia dimensaun dupla/maruak, katak, iha KRISTU no KREDA nia roman. Nune’e bele rekupera tradisaun kona-ba reflesaun patrístika, sékulu dahuluk Kreda nian: Maria nafatin ida de’it ho nia Oan no komuindade fiar-na’in sira-nian iha Nia. Maria mak protótipu Kreda nian[7].

Iha Testamentu Foun, liuliu iha Lucas, nia husik hela hahí kmanek ba feto ne’e nia santidade, Maria nia santidade.  Sei la to’o iha definisaun dogmátika Imakulada nian se la hahú husi afirmasaun perzistente no konverjente kona-ba Maria nia santidade husi tempu antigu kedas. S. Efrém (+373) iha ninia famozu Carmina Nisibena hanaran Maria, bela, lahó salan, lahó defeitu, lahó foer ida.

Maria mosu nu’udar santa-tomak, orijen redensaun nian, basá nia koopera ho laran-luak ho Kristu iha obra salvasaun nian.

Santidade mak grasa, favór divinu, uniaun ho Maromak. Santidade la konsiste de’it iha sala-laek, maibé iha partisipasaun iha Kristu nia santidade no iha prátika virtude sira-nian.

Iha Maria ita iha kriatura ida Maromak nian, hanesan ita mós, iha-ne’ebé nabilan no realiza Maromak nia planu iha ninia dimensaun tomak, husi ninia abut (Imakulada) to’o ninia konsumasaun. Ohin Nia mak prezensa moris no dinámika liuhusi komuñaun santu sira-nian (Maromak hasae ba lalehan).

Ita bele konsidera kestaun Maria nia santidade husi pontudevista rua:

1. Husi aspetu santidade pozitiva: nu’udar grasa, nu’udar eleisaun divina, nu’udar uniaun ho Maromak, virtude no karizma sira.
2. Husi aspetu negativu: laiha salan ida. Iha konkretu livre husi salan pesoál tomak no salan orijinál.

Formulasaun negativa mak espresaun imperfeita realidade ida-nian. Nia la dehan katak sá maibé simplesmente nega kondisaun salan nian. Laiha salan la identifika ho plenitude grasa nian.

Formulasaun pozitiva importante no espresiva liután. Maromak mak hili Maria ba misaun estraordinária ida no nia fiél ba misaun no projetu divinu ida-ne’e.

Festa Imakulada nian selebra liuliu Maria nia santidade, maski temi mós katak  Maromak hasai nia husi salan no prezerva nia husi kulpa orijinál.

Dogma Imakulada nian revela mai ita ema nia profundidade tuir Maromak nia projetu orijinál. Maria foti inisiativa iha moris no iha sentidu ida-ne’e ita bele dehan katak ita simu bolun ba ezisténsia ho marka/selu Maromak nia domin nian, ne’ebé iha Kristu  haraik buat hotu mai ita no bolu ita atu sai nia oan sira, atu partisipa iha ninia santidade no beleza rasik (kf. 2 Pedro 1,4 simu bolun atu partisipa iha natureza divina).

Prosimidade boot liu ba  Maromak, signifika libertasaun husi buat aat, klareza no liberdade ema nian, iha Maromak nia oin mós, basá nia la halakon/ kansela ema sira, maibé nia grasa sai forsa atu ema ida-idak sai di’ak liután no ho liberdade adere ba Ninia projetu. Salan kesi, halo sai atan (Jo 8, 34); grasa liberta (Gálatas 5,1), halakon ta’uk sira[8], fó liras atu semo no fó impulsu husi laran atu to’o iha altura foun sira, nune’e mak santu/a sira barani tebes halo.

Maria mak feto ne’ebé fó ninia konsentimentu iha ksolok no iha libedade tomak ba Maromak, atu kolabora ho Ninia projetu. Projetu ne’e realiza iha nia an iha plenitude tomak. Dehan Maria Imakulada katak dehan Maria Feto ne’ebé hetan libertasaun, maski moris iha ninia kultura nia kondisionamentu sira leet. Nia, iha liberdade totál, joga nia moris hodi adere ba buat ne’ebé nia komprende katak Maromak husu ba nia, basá grasa la absorve ita hodi halakon ita. Iha kontráriu, haboot liután autokomunikasaun grasa nian, Maromak rasik nia moris, autentisidade boot liután no plenitude ezisténsia pesoál nian, no ida-ne’e, iha moris loroloron nian, iha-ne’ebé tenke halo hilin barak no mantein orientasaun ida grasa nian no la’ós salan nian, hodi supera kbiit divizaun nian husi salan ne’ebé koko fahe ita internamente. Kbiit makso’in (halibur hamutuk no rekonsiliasaun nian) husi Kristu halo nia sai feto ida ne’ebé moris unifikada iha Maromak nia domin loron ba loron, iha buat ne’ebé nia halo no nia moris.

Maria  la livre husi sentimentu umanu intensu no vitál sira; husi limitasaun no kondisionamentu kulturál sira, husi sofrimentu, husi dalan maturasaun no peregrinasaun fiar nian, maibé diferensa ho ita, nia tau ninia impulsu no tendénsia sira hotu atu serví Maromak nia projetu santu, projetu domin konstante lahó sasukat nian (kf. Magnificat Lc 1,46-55).

Dogma Imakulada Konseisaun Maria nian subliña gratuidade no fidelidade ba Maromak ne’ebé aman-inan nia domin ba umanidade. Teólogu Karl Rahner hateten:

“Sai hanesan ne’e atu husi nia hamosu bee-matan ida Maromak nian. Ninia inísiu santu tanba kbiit domin-na’in nian lolo nia liman ba finalidade di’ak ne’e. Maromak la arrepende ho ninia don sira, dogma ne’e dehan mai ita. Ida-ne’ebé hahú mak fiél, Nia sei lori to’o rohan; ne’e mak lialoos fiar nian hateten mai ita”[9].

Tanba labele konsidera Maria nia konsentimentu livre no pesoál, iha momentu dahuluk ninia konseisaun nian, ne’e mak sinál nabilan Maromak nia domin nia gratuidade ne’ebé atua molok resposta responsavel. Maromak ne’ebé aman-inan hakohak husi hahú kedas vida umana tomak atu halo iha Kristu “kriatura foun”.

Maria hetan salvasaun ho forma  ne’e basá nia mak ida mesak ne’ebé lokaliza loloos iha pontu ne’ebé Kristu inaugura redensaun umanidade nian. Kristu ne’ebé mai atu lori ahi ninia Domin nian atu ema hotu, hodi hetan kbiit husi ahi ne’e bele fó fuan Domin ne’e nian, halakan ahi-oan dahuluk iha Maria, atu Nia ne’ebé Roman, hahú husi nia bele  habelar ba ema hotu. Versíkulu sira Liafuan nian ne’ebé bele halo ita haree buat ne’e mak:

“Ha’u mai atu lori ahi iha rai no ha’u hakarak nia lakan “ (Lucas 12,49). “Tuir kombustivel ne’ebé iha ahi sei lakan ” (Eclesiástico 28,10)

Don redensaun nian mak komunikasaun Espíritu Santu nian. Maira mak ida ne’ebé moris komunikasaun husi Kbiit Domin Maromak nian, Espíritu iha ninia an, ho modu aas liu. Nune’e mak S. Lucas aprezenta mai ita, husi foin-sa’e (anunsiasaun) to’o sai boot (Pentekostes). Obra Espíritu nian mak halo ema sira obra ida grasa no domin nian, ho fuan ida hanesan ho Maromak rasik nian basá “grasa santifikante iha ninia esénsia profunda signifika Maromak rasik, ninia komunikasaun ba espíritu hakiak nian, hodi fó prezente katak, Maromak rasik. Grasa signifika naroman, moris, abertura ba vida espirituál no pesoál ema nian ba Maromak nia reinu infinitu sira. Grasa signifika liberdade, forsa, peñór moris rohan-laek nian, espíritu pesoál  Maromak nia atuasaun iha ema nia fuan, filiasaun adoptiva no liman-rohan eternidade nian”.[10]

Iha komunidade ekleziál nia laran, Maria Imakulada mak personifikasaun no modelu Maromak nia planu no projetu ba sarani ida-idak no ba umanidade tomak. Ema ida-idak Maromak bolu pesoalmente atu sai santu no imakulada, ida-ne’e mak Maromak nia planu, hanesan knananuk iha Surat ba sarani sira iha Éfeso fó hanoin mai ita:

Rahun diak ba Maromak, Na’i Jezús Kristu nia Aman. Husi lalehan tutun, hodi Kristu, Nia haraik bensa oioin espirituál no lalehan nian mai ita. Molok atu hakiak mundu, Maromak fihir kedas ita atu moris  nu’udar ema santu, nu’udar ema sala-laek (imakulada) no moris iha domin iha Nia futar oin. Tuir nia laran-luak, Nia fihir ona ita hori-uluk kedas atu moris nu’udar nia oan hakiak hodi Kristu; ba glória nia grasa nian, ne’ebé Nia fakar mai ita iha nia Oan doben. iha Kristu, ho nia raan, ita hetan makso’in no perdaun ba ita nia sala. Ne’e mak rikusoin grasa nian ne’ebé Nia haraik mai ita iha nia matenek no prudénsia Nia fó hatene mai ita Nia hakarak nia mistériu. Ne’e mak planu ne’ebé Nia hanoin atu halo iha Kristu hori-uluk kedas, wainhira tempu to’o ona nia rohan, katak, atu halibur buat hotu iha lalehan no iha rai, hodi tau Kristu nu’udar sira hotu nia ulun  (Ef. 1, 3-10).

Iha Maria Imakulada nia roman ita hotu simu bolun atu supera konstantemente iha an rasik, iha ita-nia sorisorin no ita-nia mundu kondisaun tuan salan nian, buat aat nian no reprodús karakterísitka sira moris ida ne’ebé nakfilak tuir Espíritu Santu, ne’ebé ita bele haree husi ninia fuan sira, katak, iha an raisk no iha modu oinsá atua iha dalan moris loroloron nian. Ita bele, no ita tenke, hatudu ho jestu konkretu sira katak Maromak horik iha ita-nia fuan sira hanesan Maria halo:

 “Maibé fuan Espíritu nian mak: domin, ksolok, dame, pasiénsia, laran diak, amabilidade,laran-di’ak, fiar-fidelidade, laran-maus no ukun an; no la iha lei ida ba hasoru buat sira ne’e” (Gálatas 5,22-23).

Iha Liafuan nia roman, ita bele esplisita katak “nakonu ho grasa” sai buras no moris hodi fó fuan sira-ne’e:

1. Maria Imakulada mak Karidade, dominlahó limite, entrega lahó rezerva, soliatensaun lais, kuidadu eh tau-matan ba ema seluk.
2. Maria Imakulada mak Ksolok, ne’ebé mai husi laran liu, la-nahas, kapasidade atu haksolok ho buat ki’ik, hadaet otimizmu, fó liafoun di’ak, …
3. Maria Imakulada mak Dame, ne’ebé la’ós auzénsia konflitu nian, maibé kapasidade atu moris konflitu iha diálogu, hodi buka no hetan solusaun ne’ebé la’ós egoista, ne’ebé lori di’ak ba ema hotu.
4. Maria Imakulada mak Pasiénsia, ne’ebé iha relasaun ho estabilidade no permanénsia iha buat di’ak, iha esperansa, rezisténsia/perseveransa.
5. Maria Imakulada mak Amabilidade, ne’ebé dehan respeitu, hamnasa, ternura, akollimentu.
6. Maria Imakulada mak Bondade/laran-di’ak, katak komprensaun, jenerozidade, servisu,… tuir Maromak nia ilas.
7. Maria Imakulada mak Fidelidade, firmeza iha opsaun sira no atitude sira, konfiansa renovada, lealdade.
8. Maria Imakulada mak Laran-sadia, violénsia-laek no dosilidade, kapasidade perdaun nian.
9. Maria Imakulada mak Ukun/domina an, libertade interiór, supera paixaun sira, ekilíbriu no moderasaun, nafatin halo desizaun livre ba buat di’ak, opsaun atu mantein buat ne’ebé harii an rasik, ema seluk no mundu.

Moris ho konviksaun katak mundu ida grasa nian furak liu no di’ak liu duké mundu ida ne’ebé sala estraga, atua iha diresaun ida-ne’e ho ain-hakat ki’ik no boot, tuir ida-idak nia posibilidade. Ita hanesan bosok bainhira ita la fiar no dehan fraze sira anti-sarani, atu justifika ita-nia hahalok aat, salan eh omisaun (la halo devér), hanesan: “mundu tomak halo buat ne’e”, “sé mak interese”, “ida-ne’e umanu”… Maria Imakulada dehan mai ita katak mundu seluk ne’e posivel, katak Maromak hakarak buat ne’e no haraik mai ita nia grasa hotu. Ita buka sai hanesan Nia hodi hatene akolle nia grasa loroloron no la’o ba diresaun ne’ebé Espíritu Santu marka mai ita hodi la husik atu tendénsia seluk babeur ita. Tanba ne’e fundamentál liu uniaun ho Kristu no Maria rasik nia tulun mak Maromak nia don ida tan ba umanidade.

Ho Maria Imakulada Santisíma Trinidade hateten mai ita katak ita bele haka’as an ho barani “lori futuru ba prezente” basá Maromak nia Reinu mak prezensa futuru nian (Maromak nia domin) iha prezente nia laran, “tanba ne’e ha’u husu atu ó halakan filafali ahi Maromak nia don nian iha ó” (2 Tim 1,6).

Atu taka

Ohin, maski proklama maka’as ema nia direitu sira iha surat-tahan no diskursu barabarak, ita haree katak ema kontinua despreza no harahun moris basá ema barak mak moris iha kondisaun aat no ema seluk hanehan sira-nia dignidade eh la fó atensaun. Ita haree katak la iha apresiasaun loloos ba ema, ba ema hotu, nu’udar rikusoin folin liu. Menus iha situasaun katastrófika sira mak ema buka salva vida sira, no ida-ne’e buat ruma ona. Maibé presiza halo sai kompromisu koletivu maski susar karik bá: ema mak folin liu.

Iha sosiedade ohin nian ema apresia liu akumula eh soi sasán sira, rikusoin sira duké iha oan sira. Iha oan, loos duni, maibé tenke responsavel mós atu eduka sira kusta karik bá. Knaar no responsabilidade maternidade no paternidade nian difisil, atu tranzmite moris, no moris ne’ebé Jezús Kristu hatudu mai ita. Maromak nia kompromisu ba vida umana, hatudu iha Imakulada Konseisaun Maria nian, bele sai fatór ida atu hafoun sosiedade, apresia liután vida.

Dogma Imakulada Konseisaun Maria nian kontein mensajen ida importante liu ne’ebé tulun ita atu apresia liután moris. Ita bele rezume iha ideia fundamentál tolu:

• Ema ida-idak ne’ebé moris Maromak hadomi tebes nia no Maromak destina nia atu partisipa iha familiaridade ho Maromak rasik. No ida-ne’e hahú iha rai ne’e no sai kompletu iha lalehan.
• Vida umana ne’e lulik/sagrada iha ninia estadu hotu dezenvolvimentu nian;
• Feto nia dignidade hanesan ho mane nian tanba nia dimensaun ema nian.

Beleza sei salva mundu, maibé la’ós beleza naranaran de’it, se la’ós beleza Espíritu Santu nian. Mai ita moris no atua iha mundu hodi foti inspirasaun husi kontemplasaun kona-ba saida mak Maromak dehan mai ita ho Maria Imakulada no mai ita hafutar ita-nia mundu ne’e ho mehi foun loron ba loron, ho  entuziazmu foun ba moris.

Maria Imakulada, nakonu ho grasa, nakonu ho Maromak nia moris ne’ebé saran ba umanidade ho abundánsia akompaña no tulun ita!

 

Festa kmanek Maria Imakulada nian!

Maria Dolores Ruiz FMA

[1] “El recuerdo del tiempo en que la Iglesia respiraba con « dos pulmones » ha de impulsar a los cristianos de oriente y occidente a caminar juntos, en la unidad de la fe y en el respeto de las legítimas diferencias, acogiéndose y apoyándose mutuamente como miembros del único Cuerpo de Cristo.”JUAN PABLO II, Nuovo millenio ineunte, 48.

[2] Cf. D. FERNÁNDEZ, El pecado original ¿Mito o realidad?, Valencia 1973.

[3] Obras completas de san Agustín, tomo VI,  BAC nº 50, Madrid 1949, p.871.

[4] El franciscano Juan Duns Scoto (+1308) fue el que dio con la mejor argumentación en el tema. No separó el dogma de la Inmaculada de la cristología y la soteriología. María fue prevenida por la gracia del Mediador. Ella también tuvo necesidad de Cristo para que la previniera del pecado (cf. A. CALERO, María en el misterio de Cristo y de la Iglesia, ed. CCS, Madrid 1990, pp. 195-196).

[5] Cf. S. de FIORES, “Inmaculada” en Nuevo Diccionario de Mariología, san Pablo (3ª), Madrid 1988, p. 914.

[6] H. GRAEF, María. La mariología y el culto mariano a través de la historia, ed. Herder, Barcelona 1967, p.416

[7] LG 63

[8] Recordar que en la Biblia la expresión “No temas” aparece 366 veces.  En el amor no hay temor. “¿Quién nos separará del amor de Dios?  .. En todo salimos hipervencedores gracias a aquel que nos amó” (Rom 8, 35.37).

[9] K, RAHNER, María, Madre del Señor,  Barcelona 1967, p.58.

[10] Ibid., 60