Editoriál: Mizerikórdia no Kriasaun

Dokumentu rua Amu-Papa nian ne’ebé sai ita-nia “matadalan” iha tinan litúrjiku foun mak: “Misericordiae Vultus” no “Laudato Si”. Ita simu konvite atu hananu Maromak nia Mizerikórdia ne’ebé foti oin iha Jezús no atu rekoñese Oin ne’e iha Kriasaun tomak no sai ida de’it ho kriasaun tomak iha hananu hahí ksolok nian ba Maromak.
Tempu ita moris daudaun mak “momentu” “krize mundiál” ne’ebé Papa S. João Paulo II no Papa Bento XVI define ona nu’udar “krize valór umanu sira-nian, krize primadu Maromak nian iha moris” no oras-ne’e Papa Francisco fó hanoin krize kle’an umanidade nian tanba lakon tiha ona ninia “sentru”. Maibé nia estimula ita atu fihir metin Mizerikórdia, sentru Maromak nia obra sira!
La’ós de’it Tinan Santu Mizerikórdia nian maibé mós ho liafuan ofisiál kona-ba dimensaun sosiál ne’ebé fiar-na’in ida simu bolun atu moris iha tinan ne’e: “Laudato Si”. Mizerikórdia no kriasaun, koluna rua loos moris furak nian no moris dignu nian! Ema mak tutun kriasaun nian maibé se nia la soi Kriadór nia kbiit, se nia laiha kapasidade mizerikórdia nian, entaun nia sei liu iha moris nu’udar konkistadór ida! Maibé ita labele konkista eh hadau buat ne’ebé fó nu’udar prezente domin nian. Ema ne’ebé haree moris ho parámetru eh kritériu seluk iha risku atu sobu natureza, no atu sai, nia rasik, vítima, hamonu todan boot degradasaunnian… nu’udar rezultadu kultura konsumu no kultura soe-kedas ne’ebé ita oras ne’e asiste no halo daudaun.
Keta karik Papa Francisco husu ita atu hahú hikas fali atu evanjeliza ita-nia kultura, ita-nia sosiedade, ita-nia família, ita-nia moris, no halo ida-ne’e ho laran-manas?

Votus Tinan Santu mai ita hotu!