Husi komunidade novisiadu FMA

Dili – Iha loron 7 Janeiru 2013 selebra tiha misa abertura ba kursu interkogregasaun iha parókia saun José Aimutin. Misa ne’e prezide husi amu selebrante Yanto Ocarm no iha mós konselebrante husi kogregasaun oin-oin. Iha omilia amu Yanto, hateten katak ita nia misa ida ne’e hanesan tradisaun ida ne’ebé tinan-tinan ita tenke halo atu hahú kursu no remata kursu. Ita entrega ita-nia atividade hotu iha Maromak nia liman atu akompaña no haraik bensan ba ita-nia moris.

 

Molok atu tama ba konvíviu iha kantu ida husi kandidatu jesuita sira. Tuir mai aprezenta personajen importante sira ba partisipante kursu nian: irmán Imaculada SSPS mak nu’udar koordenadora iha kursu interkongregasionál, Padre João Paulino SDB nu’udar prezidente Konferénsia “superiores maiores” iha Timor-Leste. Liafuan agradese husi Me. Imaculada SSPS ba koordenador tuan pe.Yanto Ocarm, tanba nia simu kna’ar foun atu fila ba Flores. Nu’udar agradesementu husi formande hotu, sira tara tais ida nu’udar rekordasaun ba d’iak hotu ne’ebé Padre Yanto Ocarm hala’o iha Timór liuliu tulun ba formande sira.

Kandidatu/a sira iha tinan 2013 hamutuk 209. Formande sira ne’ebé tuir kursu interkongregasionál mak:

• Postulante hamutuk 53
• Novísia/u tinan dahuluk 48
• Novísia/u tinan daruak  7

Iha momentu fraternidade nian sira han meudia hamutuk no aprezenta teatru husi formande sira, nu’udar boas festas natál nian no agradesimentu ba pe. Yanto Ocam.

Mensajen ikus husi Padre João Paulino SDB ba asembleia tomak mak ida-ne’e: “Vokasaun iha Kreda Katólika Timor-Leste buras ba oin, ne’e hatudu ba Kreda katak imi mak prezensa Maromak nian ba mundu ohin loron ninian”.

Ohin, loron 8 janeiru 2013 hahú Kursu interkongregasionál: ba postulante sira  fatin iha Aimutin no ba Novísia/u sira iha irmán FMA sira nia fatin, Comoro.

Matéria sira ba postulante mak: Introdusaun ba teolojia, Étka no etiketa, liturjia prátika, introdusuan ba Bíblia, psikolojia dezenvolvimentu, istória Kreda  nian, katesizmu no múzika litúrjika.

Matéria ba novísia/u tinan dahuluk no daruak mak: psikolojia espirituál, pentateuku, teolojia morál, vida konsagrada, teolojia morál, dixernimentu, kristolojia, sinóptiku sira, mariolojia no sakramentolojia.