Laga – Enkontru zonál ba animadór sira oratóriu nian hahú ona sabadu iha Laga, ba zona Laga no Quelicai, no domingu iha Fatumaka ba zona Baucau, Fatumaka no Venilale. Animadór sira ladún barak, tanba oratóriu ruma hala’o ho internu eskola nian, maibé sira ne’ebé partisipa iha hakaran boot atu bele kaer oratóriu ho responsabilidade no ksolok.

Enkontru hahú hodi aprende knananuk “ofisiál” ho ninia movimentu: mane sira mós ho empeñu boot haka’as an atu hatudu sira-nia kapasidade.

Tuir mai pe. Elias de Deus hato’o reflesaun ida kona-ba karakteristika estilu salesianu nian: serbisu hamutuk nu’udar grupu. Nia konvida animadór sira atu tur hamutuk no reflete eh prepara atividade sira ne’ebé hala’o domingu domingu, atu bele haklaken Jezús liuhusi jogus, dansa, katekese no seluk tan.

Hafoin ir. Alma Castagna aprezenta tópiku sira ne’ebé sei hakle’an durante tinan ida ne’e ba oratorianu sira maibé mós ba animadór sira, atu sira bele forma an nu’udar sarani loos.

Tempu to’o ona atu “pratika” buat ne’ebé rona iha Quelicai no enkontru zonál sira ne’e: hahú di’ak tinan 2013!

Enkontru zonál sei halo tan iha Dili, loron 19 janeiru no iha Fuiloro FMA, loron 26 janeiru ba zona Fuiloro no Lospalos.