Fuiloro – Durante loron tolu nia laran husi 2-4 Janeiru 2013, irmán juniora sira halo enkontru formasaun iha Fuiloro kona-ba internet, Evanjelizasaun foun no iha loron ikus aban sei taka ho paseiu iha tasi.

Fasilitadora ba momentu formativu mak irmán Jacinta Gusmão. Kona-ba internet, nia aprezenta internet nu’udar rekursu hodi halo sira koñese website sira ne’ebé bele sai fonte ba informasaun no formasaun ne’ebé kredivel: liturjia lorloron, dokumentu Kreda nian, múzika, video… ne’ebé bele tulun iha apostoladu.

Kona-ba tema Evanjelizasaun, irmán sira hetan input kona-ba “evanjeliza ho ksolok: hodi hakle’an dokumentu ruma Evanjelizasaun nian hanesan Evangelii Nuntiandi, Instrumentum Laboris, Mensajen hsui Sínodu Bispu sira-nian. Buat ne’ebé sira hakle’an mak prosesu evanjelizadór Kreda nian ho ninia funsaun siradiakonia, koinonia, martyria no liturgia nian. Tinan Fiar nian sai apelu forte atu konfesa fiar ho an tomak ho konviksaun foun, ho konfiansa no esperansa no halo nabilan ba beibeik, ksolok no entuziazmu foun mai husi enkontru ho Kristu.  Halo nune’e de’it mak ita bele fahe ksolok ida-ne’e ho maun-alin sira, iha ita-nia komunidade no iha ita-nia misaun.

Enkontru ohin nian taka ho momentu orasaun atu ho tema selebra ita-nia fiar. Durante orasaun irmán sira halo memória kona-ba sira-nia loron Batizmu, odamatan ba moris komuñaun nian ho Maromak Trindade.