Irmán, foin-sa’e no leigu doben sira,

ita foin remata fulan Agostu, nakonu ho sele­brasaun oinoin: Kard. Pietro Parolin nia viz­ita ne’ebé halo ita sente Amu-Papa nia prezensa iha ita leet, remata sele­brasaun tinan 500 evanjelizasaun Timor nian, ita taka selebrasaun Bisentenáriu Don Bosco nia moris ho atividade lokál no nasionál oioin (fatin ruma seidauk taka Bisentenáriu ida ne’e iha nivel lokál) no nu’udar FMA, ita selebra Irmán na’in tolu nia Primeira Profisaun no Irmán na’in tolu nia Profisaun Perpétua. Eventu bar­barak hanesan ne’e marka saida iha ita-nia moris? Saida mak ita rai iha ita-nia fuan, hanesan Maria halo ho bibi-atan sira nia liafuan sira? Mensajen sá de’it sele­brasaun sira ne’e husik ba ita no halo ita haka’as an liután atu moris ho ksolok Ma­romak nia planu iha ita-nia moris?

Hotu tiha selebrasaun mundiál Bisen­tenáriu nian, Reitór-Mor, Pe. Angel Fernández Artime, hakerek surat ida ba salezianu sira, nu’udar reflesaun, nia hak­erek: “Momentu ida ne’e, lori ha’u atu hanoin, hakarak no mehi saida mak hela kle’an iha ema hotu ne’ebé moris iha eventu ida ne’e, úniku, istóriku…”. Ita sei la moris iha sentenáriu ne’ebé sei tuir mai, maibé ita simu grasa atu bele partisipa ho ativu ba Bisentenáriu ida ne’e, no ita bele husu ba ita-nia an, hanesan Reitór-Mor: “saida mak hela kle’an?”

Reitór-Mor mehi ai-fuan 5 ne’ebé Bisen­tenáriu husik ba Kongregasaun saleziana no bele fó moris, maski nia ko’alia liu­liu ba Kongregasaun salezianu sira nian, aspetu 5 ne’e bele sai dalan ba ita hotu (FMA, foin-sa’e sira no membru Familia Saleziana nian) ne’ebé hadomi Don Bosco no bolu nia Aman no Mestre. Mehi sira mak ne’e:

1. Kongregasaun ida ho salezianu(/a) sira ne’ebé haksolok, tanba, hanesan Don Bosco, moris hamutuk ho Maromak no tan Maromak
2. Kongregasaun ida ho ema fiar na’in, nakonu ho Maromak: ema hotu hatene salezianu/a sira tanba serbisu maka’as, maibé loloos sira tenke apresia ita tanba ita hatudu Maromak nia domini ha ita-nia moris
3. Kongregasaun ida ne’ebé laran-manas ba foin-sa’e sira, liuliu sira ne’ebé kiak: ita presiza hamanas liután ita-nia fuan, presiza sai kriativu no sai radikál atu bele serbí didi’ak foin-sa’e sira no oferese ba sira buat ne’ebé di’ak liu.
4. Kongregasaun ho evanjelizadór no edukadór ne’ebé loos: dala ruma ita-nia proposta para de’it iha aspetu umanu, maibé ita presiza aten-barani atu haklaken Evanjellu, maski ema la simu ita hodi basa liman ka fó limitasaun ba ita.
5. Kongregasaun ida ne’ebé mision­aria nafatin: tanba ida ne’e mak parte boot liu iha ita-nia esperiénsia pastorál; Na’i laran-luak liu, no se ita hakarak fiél nafatin ba Jezús, ba Kreda no ba Don Bosco ita presiza kontinua sai misionariu.

Sira ne’e mak Reitór-Mor nia mehi, ne’ebé ha’u sente importante liu mós ba ita-nia re­alidade iha Timor no Indonesia. Festa sira ne’e ne’ebé foin liu la bele husik ita kolen de’it ka mamuk, iha momentu sira ne’e ita iha posibilidade atu atinji ba ita-nia bee-matan fiar no karizmatika nian: momentu to’o ona atu hatudu katak ita mak Don Bosco (no Madre Mazzarello) nia oan sira, tan ne’e ita mak Kreda nia oan sira no, liuliu, Maromak nia oan sira ho hakaran ida de’it: halo Timor, no mundu tomak sai fatin iha ne’ebé Maromak bele hatudu nia An, liuhusi ita-nia prezensa.

Iha fatin barak fulan setembru mak fulan Biblia nian: ha’u hein katak ita hotu bele nafatin husik Maromak nia Liafuan gia ita no hatudu dalan loos iha ita-nia moris.

Obrigada