Iha katekeze, Amu-Papa reflete kona-ba mistériu Inkarnasaun Jezús nian
Sidade Vaticano nian – Liutiha pauza semana ida, Amu-Papa Bento XVI hahú fali katekeze iha kuarta, 2 Janeiru iha nia enkontru iha Audiénsia Jerál. Iha Sala Paulo VI, Amu-Papa dedika katekeze atu esplika kona-ba Jezús nia orijen.
Bento XVI hahú reflesaun sira hosi fó hanoin katak Na’i nia Natál leno nafatin nakukun sira ne’ebé dala barak hale’u mundu. No kona-ba naroman ne’e nia orijen, Kristu nia orijen, mak Evanjelli haat sira buka atu fó resposta ho klareza.
“… ninia orijen loos mak Aman; Nia mai totalmente husi Nia, maibé ho modu diferente husi profeta seluk Maromak haruka mai molok Nia. Orijen mistériu Maromak nian ida-ne’e, “ne’ebé ema ida la koñese”, bele haree iha istória sira kona-ba Jezús nia infánsia iha Evanjellu Mateus no Lucas nian, ne’ebé ita lee iha tempu Natál nian” nia haktuir.
No bainhira reflete kona-ba espresaun “hodi Espíritu Santu nia kbiit nia halo An ba mane iha Virjen Maria nia knotak”, Bento XVI fó hanoin kona-ba importánsia Maria nian iha konstestu Jezús nia orijen nian.
“Lahó nia Maromak nia entrasa iha istória umanidade nian sei la to’o nia rohan no sei la akontese buat ne’ebé sentrál iha ita-nia fiar nia Profisaun: Maromak mak Maromak ida ho ita. Nune’e Maria pertense ho modu irrenunsiavel ba ita-nia fiar iha Maromak ne’ebé halo, tama iha istória”.
Amu-Papa destaka mós katak, iha ita-nia moris baibain, ita bele sente ita-nia pobreza, ita-nia insufisiénsia, maibé nia fó hanoin katak Maromak hili feto haraik-an ida, iha vila ida ema la koñese. “Nafatin, iha difikuldade nia leet maski difisil oinsá bá, ita tenke iha konfiansa iha Maromak, hodi hafoun ita-nia fiar iha ninia prezensa no asaun iha ita-nia istória, hanesan iha ida Maria nian. Ba Maromak buat ida la!”.
Ikusnian, Bento XVI enfatiza katak Jezús Maromak nia Oan-Mane mesak, mai husi Maromak, no ida-ne’e mak mistériu boo ita selebra iha Natál: Maromak nia Oan, hodi spíritu Santu nia kbiit, hola isin iha Maria Virjen nia knotak.
Tuir Amu-Papa, ida-ne’e mak anúnsiu ne’ebé foun nafatin hodi lori esperansa no ksolok ba ita-nia fuan, tanba haraik mai ita serteza katak, maski dala barak ita sente fraku, kiak, kbiit laek hasoru difikuldade no buat aat mundu nian, Maromak nia kbiit nafatin hala’o maravilla oioin iha ita-nia frakeza sira.
