Dili – Loron 23 Novembru, loron intensu liu ba Kard. João Braz de Aviz, Prefeitu “Congregação para os Institutos de Vida Consagrada e as Sociedades de Vida Apostólica” iha Vaticano, basá loron ne’e nia halo enkontru rua: ida ba relijiozu/a sira iha Timor-Leste no rua, enkontru ho formadór/a sira no formandu/a sira.

Ba relijiozu/a sira atus lima resin halibur iha Canossa Haas-Laran (Comoro-Dili), Kard. Braz de Aviz buka hamanas fali sira-nia empeñu konsagrasaun nian. Iha parte dahuluk, D. João resalta pontu tolu importante ba vida konsagrada  nia moris: 1) dixipuladu Jezús nian, katak halo Evanjellu nu’udar regra suprema moris nian; 2) koñese no observa fielmente espíritu no intensaun fundadór/a nian, karizma, nune’e mós foti lisaun sira ne’ebé di’ak no esensiál; 3) fó atensaun ba kultura ohin nian atu bele inkultura Evanjellu no karizma.

Maski nia prepara ninia diskursu, nia la uza hodi prefere liu la lee no ko’alia lahó surat-tahan no rona pergunta sira atu responde tuir nesesidade. “Conferência Superiores Maiores Timor-Leste nian” tradús tiha ona dokumentu ne’e husi portugés ba tetun no fahe ba relijiozu sira.

Atu esplika elementu esensiál sira vida konsagrada nian, Kard. Braz de Aviz foti fali dokumentu sira Kreda nian hanesan Vaticano II nia Konstituisaun dogmátika Lumen Gentium n.43-47; dekretu konsiliár Perfectae Caritatis; Ezortasaun Apostólika Pos-sinodál “Vita Consecrata” no mós Surat Apostólika Nuovo Milenio Ineunte. D. João subliña katak “ohin loron presiza liuliu fó importánsia ba vida espirituál, moris tuir Maromak nia Liafuan, tau matan ba vida komunitária, fó atensaun ba ema”.  Nia hateten katak relijiozu/a sira tenke sai “kompetente iha vokasaun”.

Parte daruak enkontru nian dedika ba diálogu abertu ho partisipante sira. Pergunta sira ne’ebé aborda iha momentu ne’e hahú husi moris votus sira-nian no eskándalu sira, vida komunidade nian, orasaun no importánsia akompañamentu nian, importánsia ema nian liufali obra sira, formasaun, inkulturasaun, pastorál no insersaun iha parókia, mundu modernu sosiedade informátika nian, fidelidade vokasionál, nst.

Enkontru ho formadór/a –fomandu/a sira mós enfrenta tema formasaun, vida komunitária no autoridade.

Depoizde loron intensu formasaun nian ne’e, remata momentu espesiál ho Kard. Braz de Aviz ho selebrasaun eukarístika, hodi hafoun fali empeñu sequela Christi no saran an ba maun-alin sira iha rikusoin diversidade karizma kongregasaun ida-idak nian.