Mensajen Fátima nian mak konvite ida no eskola ida salvasaun nian, hahú husi Anju Pás/dame nian (1916) no kompleta husi Nai-Feto (1917). Ho modu istóriku bibi-atan ki’ik-oan nain tolu mak halo esperiénsia – Lúcia, Francisco no Jacinta.

Irmán Lúcia rasik dehan iha ninia dada-lia ho Kardeál Ratzinger (agora Amu-Papa) katak objetivu aparisaun hotu nian mak haburas liután fiar, esperansa no karidade: buat sira seluk hakarak lori ba ida-ne’e” .

Mensajen Fátima nian subliña pontu sira tuirmai:

• konversaun permanente;
• orasaun / rozáriu;
•  sentidu responsabilidade koletiva no prátika reparasaun nian.

Simu mensajen ida ne’e lori ho nia Konsagrasaun ba Maria nia Futar Fuan Santu Sala-Laek (Coração  Imaculado), símbolu fidelidade no apostoladu nian.

Orasaun sira ne’ebé Anju no Nai-Feto hanorin iha Fátima, hanesan Amu-Papa João Paulo II hateten, iha Fátima tinan 1982, mak konversaun no moris iha Maromak nia grasa. Devosaun ba Rozáriu mak devosaun ida ne’ebé hetan pedidu/hahusuk insistente iha Mensajen Fátima nian. Virjen Maria iha ninia aparisaun sira iha Fátima husu atu reza tersu/rozáriu loroloron. Iha ninia aparisaun dahuluk kedas iha loron 13 Maiu 1917, Nai-Feto lia tun dehan: “Imi reza Tersu loroloron” .

Vidente Lúcia  (Ir. Lúcia) konta katak iha loron 13 Jullu 1917 Nai-Feto rekomenda: “Imi halo sakrífisiu ba sala-nain sira no dehan beibeik, no ho modu espesiál bainhira imi halo sakrifísiu ruma: Ó Jezús, tanba domin ba Ita, ba sala-nain nia konversaun  no reparasaun ba sala sira hasoru Maria nia Futar Fuan Sala-laek!”

Iha aparisaun hanesan, Nai-Feto dehan tenik: “Bainhira imi reza tersu, imi dehan hotu tiha mistériu ida-idak: Ha’u-nia Jezús, haraik perdaun ba ami salan, keta husik ami monu iha ahi inferno nian; lori klamar sira hotu ba Lalehan, liuliu sira ne’ebé ema haluha atu harohan bá”  (“Ó meu Jesus, perdoai-nos, livrai-nos do fogo do inferno; levai as almas todas para o Céu, principalmente as que mais precisarem”).