Dili – Tinan ne’ebé Amu-Papa Francisco dedika ba Vida Konsagrada fó oportunidade atu Prefeitu “Congregação para os Institutos de Vida Consagrada e as Sociedades de Vida Apostólica” iha Vaticano, Kardeál João Braz de Avis mai vizita Timor-Leste hodi selebra eh taka Tinan ne’e ho konsagradu/a sira rai ne’e nian.

Ohin, 22 Novembru, tuir programa, Kard. João Braz de Avis, prezide Missa iha Katedrál Dili hamutuk ho Bispu Basílio, Bispu Norberto no Mons. Ionut Paul (husi Nunsiatura) nune’e mós amlulik lubuk ida, iha Solenidade Na’i Jezús Kristu Liurai Universu nian. Iha ninia omilia, nia hateten katak nia mai Timor “espresamente ba relijiozu/a sira” iha Tinan grasa nian dedika ba sira. Komenta Evanjellu Nia dehan katak Maromak hadomi ita “apaixonadamente” la’ós tanba ita di’ak maibé “tanba Nia hili atu sai nune’e”, katak “Domin-na’in”. Nune’e mak Maromak ukun ita, nia ukun la’ós hanesan rai nia ukun. “Maromak nia podér la’ós podér ne’ebé oho, maibé salva… Maromak mak Maromak vida nian, nune’e, sé mak tuir Maromak nunka multiplika mate”. Hanesan Maromak ne’ebé nia podér boot mak domin, nune’e “ita simu bolun la’ós atu domina, manda, maibé atu serví povu”, Kard. João esplika. Haree katak lideransa Timor ho Kreda liga malu di’ak, Kard. Braz de Avis husu atu “ita hotu la’o ba kiak sira”, no insiste katak “ita-nia podér mak servisu”, no nia harohan atu “Timor-oan hotu sai Maromak nia Povu no servidór Maromak nian”.

Hotu tiha Missa, Kard. Braz de Avis hasoru foin-sa’e sira iha Katedrál nia oin. Ninia pergunta ulukliu ba sira mak “Imi, imi foin-sa’e sira hadomi Papa Francisco? Imi hadomi Jezús Kristu?” Sira hatán hotu “sin”. Nia hahú hodi dehan katak “Buat ida ita hakarak iha ita-nia moris mak haksolok… foin-sa’e sira hakarak haksolok…maibé balun la fiar ona katak Maromak bele halo ita haksolok. Ita sira-ne’e sei fiar”. Maromak ne’ebé hadomi ita mak ita-nia ksolok nia hun. Liga ho ida-ne’e iha pergunta ida husi joven ida: oinsá ami bele halo ami-nia moris di’ak? Kard. Braz de Avis hatán katak, hodi moris tuir Evanjellu. No ida-ne’e ba ema hotu, ba konsagradu sira, ba kaben-na’in sira… Ne’e mak konsellu uluk liu D. Braz dehan katak atu haksolok uluknanai “kaer Evanjellu no lee saida mak Jezús dehan, hafoin moris tuir buat ne’ebé Jezús dehan”. Basá nia dehan “Iha sentru Evanjellu nian iha buat ida importante Jezús nia domin boot mai ita”. Jezús la halo propaganda…Nia saran nia moris mai ita.

Kardeál Braz de Avis ezorta atu foin-sa’e sira “tuir Jezús iha buat hotu…Bainhira han, bainhira hemu, bainhira ita toba, bainhira ita hadeer, bainhira ita estuda, bainhira ita paseia, bainhira ita namora, bainhira ita kaben… [joven hotu hakilar]. Imi hanoin katak la iha namoru kristaun? Namoru kristaun ne’e hanesan ho namoru seluk?” Nia husu atu moris ho Evanjellu no mate ho Evanjellu.

Ba joven ida ne’ebé husu kona-ba feto-raan ne’ebé ko’us no arrepende, konfessa, maibé padre la husik atu nia komunga, Kard. Braz hateten katak se nia arrepende, nia konfessa, nia bele komunga. Ema ne’ebé sala, ema ne’ebé kaben hafoin haketak malu no kaben fali, hola parte nafatin ba Kreda. Kreda la hasees nia. Nu’udar ema fraku Kreda tenke tau matan ba nia, D. Braz hateten.

Nia mós konvida atu foin-sa’e sira deskobre sira-nia vokasaun ba kazamentu eh ba konsagrasaun iha vida relijioza no amlulik. Atu sira bainhira iha problema atu hakbesik ba ema adultu eh amlulik ka konsagradu sira, bainhira haree ema Kreda nian la moris loos atu fó haten nune’e sira bele hadi’ak an….

Enkontru ne’e, maski badak, hala’o iha klima simplisidade no familiar, basá Kardeál ko’alia husi fuan no ho linguajen foin-sa’e sira-nian.

Tuir oráriu nia vizita husi loron 21-24 Novembru 2015 no marka ona enkontru oioin ho nia: loron 22 Novembru, Domingu Kristu Liurai, hotu tiha Missa tuku lima, iha Katedrál Dili, hasoru malu ho foin-sa’e sira; 23 Novembru, enkontru ho konsagradu/a sira iha parte dadeer to’o tuku haat loraik, iha loraik ho formande sira; loron 24 Novembru, enkontru ho pároku no superiór/a sira kongregasaun nian iha Timor-Leste iha dadeer to’o meiudia molok nia viajen fila hikas ba rai seluk.