Dili – Inspetoria FMA TIN hahú ninia programasaun tinan 2015-2020 hodi envolve FMA no leigu no foin-sa’e sira iha loron 11 Novembru kalan ho orasaun rozáriu hamutuk. Programasaun ne’e atu bele realiza vizaun Kapítulu Jerál 23 (2014) ba tinan lima mai ne’e.

Loron dahuluk programasaun nian (12 Novembru) dedika atu “hateke ba realidade” mundiál, Timor-Leste, Indonesia, ba ita-nia komunidade sira ho esperansa. Ir Jacinta Gusmão aprezenta realidade mundiál ne’ebé kapitulár sira identifika nu’udar mudansa kulturál no antropolójika sira ho sira-nia dezafiu ne’ebé interpela ita atu hatán ba foin-sa’e sira nia hamrook no hamlaha oioin ohin loron. Hafoin, Pe. Mouzinho Lopes aprezenta realidade Timor-Leste ohin, hanesan haktuir iha livru “Mai haré Timor” hasai iha okaziaun selebrasaun tinan 500 evanjelizasaun iha Timor-Leste. Ir Maria Fe Silva no Ir Lanny Ganda aprezenta realidade Indonesia nian, katak Jakarta no Sumba.

Hotu tiha aprezentasaun ne’e, partisipante sira fahe ba grupu lima atu identifika dezafiu sira ne’ebé interpela ita nu’udar komunidade edukativa.

Dezafiu ne’ebé interpela ita mak hanesan tuirmai ne’e:

1. Degradasaun valór familia nian (kuran iha respeitu-malu, fidelidade no edukasaun étika/morál ba oan sira; fiar namlele no buka matan-dook; fó liu valór ba barlake; violénsia doméstika,) tan ne’e presiza formasaun ba família, hodi envolve família sira rasik.
2. Habiit kualidade Edukasaun formál eh informál, konsolida komunidade edukativa no tranzmite valór sira, umanu no sarani ho konstánsia, fó atensaun ba meiu sira informasaun no teknolojia nian.
3. Akompañamentu Pesoál ba família, edukadór/a sira, foin-sa’e no labarik sira.
4. Tau matan ba ekolojia iha aspetu umanu no ambientál no serbisu hamutuk ho parseiru sira seluk ne’ebé iha vizaun antropolójika hanesan ita.

Iha loraik Ir Alma Castagna, provinsiál FMA TIN, aprezenta “liña asaun sira” ba hilin konversaun tolu Kapítulu Jerál nian: 1) nakfilak an liuhusi enkontru; 2) hamutuk ho foin-sa’e sira; 3) misionária sira esperansa no ksolok nian. Grupu sira kontinua ho servisu atu hili liña asaun no modalidade konkreta realizasaun nian atu hatán ba dezafiu prioritáriu sira.