RV – Papa Francisco taka serbisu sira Sínodu nian kona-ba família, iha loron 24 Outubru iha Vaticano, no hateten katak semana tolu ikus sira-ne’e loke “orizonte foun” ba Kreda nia moris.

“Ita buka loke orizonte sira atu supera ermenéutika konspiratória eh perspetiva takan, atu defende no habelar liberdade Maromak nia oan sira-nian, atu tranzmite beleza Liafoun Di’ak sarani, ne’ebé dalabarak ferrujen husi linguajen antigu eh inkomprensivel falun tiha”, Papa Francisco deklara, iha intervensaun halo ho odamatan taka no depois Santa Sé publika.

Iha Sínodu nia partisipante sira nia oin, Amu-Papa deklara katak “devér dahuluk Kreda nian la’ós aplika kondenasaun sira eh anátema sira, maibé haklaken Maromak nia laran-sadia, bolu ba konversaun no lori ema hotu ba Na’i nia salvasaun”.

“Esperiénsia Sínodu nian halo ita komprende di’ak mós katak defensór loos doutrina nian la’ós sira ne’ebé defende liafuan ida-idak, maibé espíritu; la’ós ideia sira, maibé ema; la’ós fórmula sira, maibé gratuidade Maromak nia domin no perdaun”, nia salienta.

Tema sira kona-ba família la remata ho Sínodu

Papa Francisco aprezenta reflesaun ida kona-ba saida mak tenke signifika ba Kreda “taka Sínodu dedika ba família”, ne’ebé remata ho modu ofisiál iha domingu 25 Outubru ho Misa iha Bazílika S. Pedro.

Dalan ne’e nia rohan, Amu-Papa afirma, la signifika katak remata tema hotu, maibé tema sira-ne’e nia debate halo iha “roman Evanjellu nian. tradisaun nian no istória tinan rihun rua Kreda nian”, hodi la “monu iha repetisaun fasil iha buat ne’ebé diskute-laek eh hateten tiha ona”, “lahó ta’uk no hodi la subar ulun iha rai-henek laran”.

“Seguramente la signifika katak ita hetan solusaun ezaustiva ba difikuldade dúvida sira hotu ne’ebé sadik no ameasa família”, nia admite.

Papa Francisco ko’alia kona-ba bispu sira nia reuniaun no reprezentante sira seluk komunidade katólika sira-nian nu’udar prova ida “vitalidade Kreda Katólika nian”, iha “períodu istóriku dezánimu no krize sosiál, ekonómika, morál no negatividade ne’ebé domina”.

Sínodu la tama iha kestaun dogmátika sira

Sínodu dezafia Igreja no  sosiedade atu komprende importánsia “instituisaun família no Matrimóniu nian entre mane no feto”, harii iha “unidade no indissolubilidade”.

Amu-Papa Francisco lamenta katak ema ho fuan ne’ebé taka, hili atu “julga”, dalaruma superioridade no superfisialidade, kazu difisil sira no família sira ho kanek”.

Iha pasajen seluk ninia diskursu nian, Amu-Papa kritika sira ne’ebé opoin ba dinámika  sinodál “ho métodu sira ne’ebé la’ós totalmente di’ak”, hodi reforsa katak  asembleia ne’e nunka hakarak tam iha kestaun dogmátika sira, “ne’ebé Majistériu Igreja nian define didi’ak”.

Sínodu signifika la’o hamutuk

Liutiha semana tolu enkontru nian ho responsavel sira mundu tomak nian, Amu-Papa fó hanoin katak buat ne’ebé hanesan “normál” ba bispu ida husi kontinente ida bele sai “kuaze eskándalu ida” ba seluk.

“Dezafiu ne’ebé ita iha iha ita-nia oin nafatin hanesan: haklaken Evanjellu ba ema ohin nian, hodi defende família husi atake ideolójiku no individualista sira hotu”, nia hatutan, hodi bolu atensaun ba perigu sira relativizmu nian eh atu “demoniza sira seluk”.

Nu’udar konkluzaun, Papa Francisco sustenta katak, ba Igreja, taka Sínodu signifika “ita filfali loloos atu «la’o hamutuk» atu lori ba parte hotu mundu nian, ba dioseze ida-idak, ba komunidade ida-idak no ba situasaun ida-idak roman Evanjellu nian, Kreda nia hakohak no apoiu husi Maromak nia laran-sadia”.

Iha loron 22 Outubru Papa Francisco fó sai kriasaun kongregasaun foun Kúria Romana ba área sira Família, Leigu no Vida nian. Anúnsiu ida-ne’e fó relevu liután ba área Família nian iha organizmu sentrál Kreda Katólika nia governu nian, ne’ebé kolabora diretamente ho Amu-Papa.