Husi irmán Ermelinda Gomes

Dili- Iha loron 23 Dezembru 2012, iha Palásiu Governu organiza tiha festa Natál hamutuk husi “Primeiro Ministro no Ministra Solidariedade Social” ba labarik oan-kiak sira, aleijadu sira husi distritu 13, hodi fahe ksolok ida ne’e hamutuk ho sira nu’udar familia boot, ho ai-han no prezente ba sira-ida-idak  inklui responsavel sira hotu. Sira ne’ebé marka prezensa la’ós de’it husi orfanatu sira, naibé mós sentu sira serbisu ba ema ne’ebé presiza, emprezáriu sira ne’ebé fó mós sira-nia kontribuisaun ho envelope hodi dada rifa, nune’e depende ba sorte se mak hetan barak husi ema ne’ené fó barak.

 

 

Durante selebrasaun aleinde iha múzika husi artista timorense sira, iha mós reflesaun Natál nian husi padre Jordão fdcc kona-ba “Natál lori roman no dame iha mundu”. Nia hateten katak “hanesan Maria nia Fiat no nia hananu Magnificat ba kmanek ne’ebé Maromak halo iha nia moris hodi fó an tomak ba planu Maromak nian, nune’e Salvasaun tama iha mundu. Maromak hili ema ki’ik no mukit sira atu hatudu nia kbiit ba ema tomak”.

Nune’e Natál ida ne’ebé organiza husi Primeiro Ministro nu’udar aman ne’ebé hakarak fahe ksolok ida ne’e ho ki’ik no kiak sira hodi hatudu sira nia solidariedade no domin ba hirak ne’ebé ema haluha no la tau matan basa sira ne’e mak simu ksolok no dame Natal nian iha sira fuan.

• Husi Orfanato S.Domingos Savio Venilale Me. Gianna mak representa ho oan-kiak nain 4.
• Husi Orfanato Laura Vicuña Laga Me. Ermelinda Gomes mak representa ho oan-kiak nain 3 ne’ebé hela ida Dili.
• Selebrasaun furak tebes tanba Primeiro Ministro la’o tuir grupo ida-idak atu hasai foto no fó tempu atu ko’alia ho labarik sira no fahe prezente Natal nian ba sira.
• Hafoin iha mensajen ikus husi Primeiro Ministro maibe ami fila ona tanba kusze tuku sanulu kalan.
• Hafoin ema hotu hakfodak tanba sunu fugeti ne’ebé lakan nabilan loos halo ema hotu admira hodi hateke sa’e ba lalehan kontempla fogeti ho kór oioin furak loos…
• Ema hotu ne’ebé hola parte iha Natal hamutuk ida ne’e fila ba uma ho kolok tanba iha presenti barak no lori fali todan.
• Buat ida ne’ebé furak mos mak Primeiro Ministro haruka labarik sira ne’ebé fa’an boneka no boné natál nian no buat seluk tan tama hotu iha palásiu hafoin Primeiro Ministro sosa fali no fahe ba partisipantes hotu.
• Reprezentante husi orfanatu sira relijioza sira mak maioria tau matan ba ema ki’ik no kiak sira no leigu sira ne’ebé tau matan mós ba sira ajeijadu sira.