Amu-Papa Bento XVI, iha audiénsia kuarta-feira liubá ne’ebé fó ba Kardeál Angelo AMATO, SDB, Prefeitu ba Kongregasaun Kauza Santu sira-nian, asina tiha Dekretu milagre kura nian ne’ebé atribui ba intersesaun Venerável Serva Maromak nian Maria Troncatti (+1969), Figlia di Maria Ausiliatrice, Misionária iha Ecuador.

Hanesan La Madre hakerek ona tempu ruma liubá kona-ba Ir Troncatti nia santidade nia dehan: “Ita simu prezente ida-ne’e nu’udar  priviléjiu domin Maromak nian ba Família saleziana tomak no ba Institutu Figlie di Maria Ausiliatrice iha partikulár. Santidade família nian fó onra ba grupu hotu ne’ebé moris tuir espiritualidade saleziana Don Bosco nian. Estímulu atu moris karizma ho paixaun no tranzmite ba jerasaun foin-sa’e iha mundu ida nakonu ho dezafiu, maibé mós riku ho sinál esperansa nian. Meta santidade nian ne’ebé hetan Kreda nia  rekoñesimentu mak prezente estraordináriu Maromak nia laran-luak nian; maibé, sasukat aas santidade nian ne’ebé moris iha loron baibain mak empeñu ita ida-idak nian. Ita fanun fali paixaun ba santidade ida ne’ebé simples no ejizente ne’ebé própriu ita-nia vida saleziana nian no, uluknanai, vida evanjélika ida moris iha koerénsia no totalidade don nian”.

Maria Troncatti  moris iha Pisogneto di Corteno Golgi (Brescia) loron 16 Fevereiru 1883, oan dasanuluk husi na’in 14 husi Giacomo no Maria Rotondi. Ho esperiénsia moris nian bainhira ki’ik hakmatek de’it, nu’udar adolexente badinas no vida sarani simples maibé kle’an  iha família no iha komunidade parókial halo nia sai sensível ba vokasaun relijioza, ne’ebé dudu nia atu tama iha Institutu FMA bainhira nia tinan 21, iha Torino. Nia halo profisaun dahuluk iha 1908 iha Nizza Monferrato. Durante funu mundiál dahuluk (1915-1918) irmán Maria tuir kursu asisténsia sanitária no servisu nu’udar enferimeira krús vermella nian iha ospitál militár iha Varazze: esperiénsia ida ne’ebé serve duni ba ninia atividade naruk liu nu’udar misionária iha ai-laran boot Amazona nian iha Ecuador. Iha tinan 1922 nia ba Ecuador, iha rai-nain Shuar sira-nia leet, hamutuk ho nia irmán maluk nain rua hodi hahú knaar difisil evanjelizasaun nian iha perigu oioin nia leet, inklui balada fuik ai-laran nian no mota boboot ne’ebé tenke hakat liu ho de’it ”ponte” frájil sira halo husi trepadeira sira, eh iha ema índiu sira-nia kabás leten. Macas, Sevilla Don Bosco, Sucúa mak “milagre” ruma ne’ebé to’o agora sei buras husi irmán Maria Toncatti nia knaar evanjelizasaun nian: enfermeira, sirurjiaun no ortopédiku, dentista no anestezista… Maibé liuliu katekista no evanjelizadora, riku ho rekursu boot fiar nian, pasiénsia no domin fraternu nian. Ninia obra ba feto Shuar nia promosaun nafunan ho família sarani foun lubuk ida, ne’ebé kazál kaben-na’in foin-sa’e sira rasik ho liberdade hili atu forma. Irmán Maria mate iha asidente aeréu trájiku ida iha Sucúa iha loron 25 agostu 1969, hodi saran nia an ba rekonsiliasaun entre kolonu no rai-nain sira. Ninia isin mate deskansa iha Macas, iha Provinsia Morona (Ecuador).  Nia sai Venerável iha loron 8 Novembru 2008.

 

11-05-2012