Baucau – “Sai misionária/u ksolok no esperansa nian” mak tema festa agradesimentu komunidade FMA Baucau nian, ohin 18 Outubru 2015 loraik. Okaziaun festa agradesimentu no nia tema la’o hamutuk ho Loron Mundiál Misaun nian ne’ebé monu iha domingu ohin.

Labarik no foin-sa’e sira husi oratóriu Teulale, oratóriu Dewaque, Infánsia Misionária, grupu Laura no Mazzarello, ADMA, Antigas Alunas FMA no inan-aman  sira, viziñu sira halibur hamutuk atu hasae gratidaun ba Maromak no ba malu. Atividade hahú ho Irmán Jacinta Gusmão, diretora uma nia liafuan. Nia konvida hotu-hotu atu agradese uluknanai Maromak ba don moris nian; agradese inan-aman ne’ebé tau matan mai ita no agradese malu tanba, ita ida-idak mak prezente ida ba maluk sira seluk. Rekoñese don sira ita simu, ita mós buka fahe ba maluk sira hodi sai misionária ho karakterístika ksolok nian. Ir Jacinta fó hanoin mós katak ohin iha Roma, iha kanonizasaun ba Santa Terezinha do Menino Jesus nia inan-aman: Zelie no Louis Martin. Ezemplu eh modelu ida ba inan-aman sira atu eduka oan sira atu buka rikusoin importante liu iha mundu, katak deskobre Maromak nia planu ba oan sira nia moris no la monu ba babeur sira mundu ohin nian.

Atividade hahú kedas ho jogu misionáriu fahe ba grupu kontinente lima: kontinente Europa ne’ebé haruka misionáriu sira mai to’o Timor; kontinente Áfrika iha-ne’ebé Povu Israel nia bei-ala sira halo esperiénsia Maromak nian; kontinente  Amérika, hakle’an kona-ba primeira espedisaun misionária FMA; koñese kontinente Ázia, hakle’an kona-ba prezensa FMA iha Timor-Leste; Oseania, Don Bosco nia mehi misionária kona-ba Oseania.

Hotu tiha jogu,  kontinua kedas ho Misa ho Pe. David Sávio nu’udar selebrante ne’ebé iha ninia omilia ko’alia kona-ba Agradesimentu ba Maromak no ba malu. Husi reflesaun leitura sira ohin nian, Pe. David foti liafuan xave “atan”. Sai misionária katak sai “atan”. Ezemplu ida sai atan mak “Irmán sira”, ne’ebé iha komunidade ne’e, serví labarik no foin-sa’e sira iha oratóriu no atividade sira seluk…tanba ne’e mak ita agradese!

Hotu tiha Misa hahú kedas ho “merenda-cena”, ne’ebé loke ho ko’a kek. Labarik sira no foin-sa’e sira husi sentru ida-idak, inan-aman sira, membru asosiasaun sira ida-idak lori buat ruma sira prepara no tau hamutuk hodi halo konfraternizasuan agápika, haksolok hamutuk nu’udar Família Saleziana.

Ikusnian, taka ho dansa no aprezentasaun husi grupu oioin atu hatudu talentu no kumprimenta malu.