Editoriál: Fidelidade nia segredu

Ohin loron mundu presiza feto no mane sira ne’bé moris Evanjellu, sai profeta no haklaken esperansa. Tanba ne’e mak, maski ohin ema susar atu fó an tomak ba Maro­mak, susar liu atu moris iha fidelidade, vida konsagrada sei atuál liu. Papa Francisco, aprezenta ilas ida vokasaun nian nu’udar ézodu. “Ésperiensia ézodu nian mak para­digma vida sarani nian ne’ebé hakohak vo­kasaun espesiál dedikasaun nian ba servisu Evanjellu nian. Konsiste iha atitude ida ne’ebé hafoun nafatin konversaun no trans­formasaun, kontinua iha dalan…”. Konti­nua halo dalan, moris iha ézodu, implika iha korajen atu rona Maromak nia Liafuan ne’ebé bolu, ne’ebé haraik mai ita kbiit no dudu ita ba oin, no la hela paralizadu iha sírkulu ne’ebé taka metin ita iha ita-nia serteza sira no ita-nia egoízmu.

Ita konsege korresponde ba Maromak nia bolun se ita iha moris orasaun nian. Ita-nia intimidade no buka nafatin Nia hodi horik ho Nia mak segredu ba ita-nia moris fiél: rona Nia, asimila nia Liafuan no fó sasin. Nune’e de’it mak ita-nia vokasaun sai fekunda no fó fuan. Ita-nia misaun mak fó fuan.

Maria Nazaré nian mak modelu loos moris fekunda vokasaun nian. Nia rona Liafuan, simu, no husik Liafuan foti isin iha nia. Nia mak modelu loos rona, asimila no fó sasin Maromak nia Liafuan, momentu ba mo­mentu, iha ksolok no iha susar.

Iha kultura ida moris lahó kompromisu de­finitivu, katak lahó obrigasaun to’o mate, mai ita kaer metin ba tali aliansa nian ho Maromak no hamriik metin iha ai-kabelak nia Liafuan nian atu keta mout iha laloran boot sira sosiedade nabeen ohin nian, hodi fó solidés ba ita-nia moris no sai sasin ba maun no biin-alin sira Maromak haruka ita bá.