Amu-Papa nia katekeze ikus ba tinan 2012

“Maria nia fiar”

Sidade Vaticano – Audiénsia jerál kuarta ne’e nian realiza iha Sala Paulo VI. Iha semana datoluk tempu Adventu nian, Amu-Papa aprezenta ba sarani sira reflesaun ida kona-ba Maria nia fiar hahú husi mistériu boot Anunsiasaun nian. Ne’e mak katekeze ikus kona-ba FIAR iha tinan 2012.

[Asesu kópia ho lia-portugés]

Bento XVI hahú hodi fó hanoin katak anju konvida Maria atu haksolok, hodi bolu nia “nakonu ho grasa”. Saudasaun ne’e haklaken katak laran-susar mai husi limite sira moris nian. terus nian, mate nian, buat aat nian, nakukun aat nian ne’ebé halakon Maromak nia laran-di’ak to’o ona ninia rohan. “Ne’e saudasaun ida  ne’ebé marka Evanjellu nia hahún, Liafoun di’ak nia inísiu” – dehan Amu-Papa.

 

 

“Maria nia ksolok nia hun mak grasa, komuñaun ho Maromak. Nia mak kriatura ida ne’ebé, liuhusi ninia atitude raronak no obediénsia nian, loke ho modu úniku odamatan sira ba ninia Kriadór, hodi saran an iha ninia liman, lahó limite”.

“Hanesan Abraun, Na’i-Feto mós konfia tomak ba Maromak nia Liafuan, hodi sai modelu ba sarani hotu. No ho modu hanesan, ninia fiar mós inklui momentu ida inserteza nian – oras nakukun  iha ne’ebé ema hedi nia Oan ba krús – molok to’o iha naroman Moris-Hi’as nian”.

Amu-Papa esplika katak  nune’e mós mak akontese ho ita-nia dalan fiar nian: eziste momentu  naroman nian no pasajen sira iha-ne’ebé Maromak la prezente; ninia silénsiu hatodan ita-nia fuan no ninia vontade la tuir ita-nian.   “Maibé – salienta Bento XVI – hetok ita loke an ba Maromak, hakohak don fiar nian no tau ita-nia konfiansa iha Nia – hanesan Abraun no Maria halo – hetok Nia sei tulun ita atu moris situasaun sira vida nian ho dame no ho serteza kona-ba ninia fidelidade no domin. Ida-ne’e implika katak ita sai husi an rasik no husi ita-nia projetu sira no husik Maromak nia Liafuan sai ahi-oan ne’ebé leno ita-nia hanoin no hahalok sira”.

“Maria nia fiar metin sai realidade de’it tanba ninia atitude konstante diálogu íntimu ho Maromak nia Liafuan, tanba ninia haraik-an kle’an no obediente, ne’ebé aseita buat hotu, mós buat ne’ebé nia la komprende kona-ba Maromka nia hahalok”.

Atu taka, Bento XVI dehan katak solenidade Natál nian konvida ita atu moris haraik-an no obediénsia fiar nian hanesan ho Maria. “Maromak nia glória la hatudu iha triunfu no podér Liurai nian, la nabilan iha sidade famoza ida, iha kadunan riku ida, maibé horik iha virjen ida nia knotak, hatudu an iha kosok-oan ida nia pobreza”.