Dili – Iha enkontru ohin, 3 Outubru, Ir Alma no Irmán diretora FMA sira halo reflesaun kona-ba Animasaun Vokasionál bazeia ba dokumentu ida ho títulu “Aspetu konverjente iha animasaun vokasionál SDB-FMA”, rezultadu reflesaun hamutuk husi Konselleiru Jerál SDB no Konselleira Jerál FMA sira nian hala’o iha Castelgandolfo iha loron 7  Jullu 2015.

Liuhusi sharing bele haree katak tuir esperiénsia ne’ebé iha, dalabarak iha joven barak gosta atu tuir atividade enkontru vokasionál ne’ebé propoin ba sira, halo esperiénsia orasaun, animasaun oratóriu, maibé difisil ba sira atu foti desizaun atu kontinua dalan vokasaun nian liuliu vokasaun relijioza nian. Ninia razaun mak hanesan sira la iha aten-brani atu hili no liuliu sira sente atrasaun liu ba buat ne’ebé mundu oferese ba sira ohin-loron duké saran moris ba Maromak.

Tan ne’e irmán diretora sira haree pontu ruma nu’udar dezafiu atu ita FMA sira sai sasin ksolok nian ho vokasaun rasik; asegura akompañamentu pesoál ba joven sira no la’ós lori sira ba an rasik; haka’as-an atu fó kualidade ba katekeze no atividade sira seluk; envolve família nu’udar fatin fini vokasaun nian; sai bá li’ur, prezensa iha eskola sira atu hasoru foin-sa’e sira…

Hafoin Irmán sira mós identifika hilin prioridade nian hanesan tuirmai ne’e:

• Akompañamentu ba joven sira iha komunidade no projetu pastorál juveníl, atu tulun sira deskobre Maromak nia planu ba sira nia moris;
• Fó valór ba ita-nia presenza iha joven sira nia leet, porezemplu iha universidade, iha eskola, iha ita-nia komunidade rasik, iha fatin hotu ita bá;
• Favorese kreximentu fiar nian, no halo domin ba Na’i Jezús nu’udar sentru moris nian;
• Oferese ba joven sira empeñu forte iha volontariadu ka iha grupu solidariedade atu iha kontaktu ho kiak sira;
• Fó sasin kona-ba moris no serbisu hamutuk entre FMA no SDB; joven la haree ita reza hamutuk, serbisu hamutuk, halo projetu hamutuk no haksolok hamutuk;
• Halo serbisu vokasionál nian hamutuk SDB no FMA no ho grupu sira seluk Família Saleziana nian.

(Veronika Kusnadi)