Dili – Grupu Irmán Juniora sira no formande tuir semináriu ida kona-ba  tema “Resiklajen litúrjika”, ne’ebé hala’o iha salaun João Paolo II Comoro husi loron 18 – 19 Setembru, ne’ebé Ir. Josefa Boavida mak fasilita no akompaña husi Ir Alma Castagna FMA, privonsiál. Iha semináriu ne’e fó importánsia liu kona-ba selabrasaun Eukaristia. Dala ruma ema ho ninia liberdade uza sala ou halo abuzu lei Kreda nian hodi halo buat ne’ebé Kreda rasik la aprova. Parte sira liturjia Eukaristia nian:

Sinal Krús nian: nu’udar Kristaun ida la moe no la ta’uk halo sinal krú iha momentu ida-idak moris nian. Kristaun ne’ebé fiél ba ninia fiar, nia barani tulun no lori ema seluk atu hametin sira nia fiar ho ninia sasin moris nian.

Liturjia Liafuan Nian: Momentu ne’ebé Maromak halo diálogu ho Nia emar sira liu husi Nia futar Liafuan. Ema presisa rona ho atensaun tomak iha momentu ne’ebé Maromak hakarak ko’alia ba nia povu. Ema la presiza halo introdusaun eh komentáriu naruk kona-ba Leitura sira iha Santa Misa, ida ne’e Maromak rasik nia liafuan no Maromak rasik hato’o mai ita ninia emar sira. Ema nia parte atu rona no halo tuir iha moris.

Altár: Fatin santu no sagradu, Kristu rasik nia horik fatin. Ema la iha devér atu tau iha Altár sasán sira ne’ebé la tuir Kreda nia regulamentu sira. Iha Altár iha de’it lilin no Maromak futar Liafuan. La uza buat barak atu dekora altár, maibé halo simples atu ema bele partisipa ho di’ak durante selebrasaun Eukaristia.

Ambaun Leitura; Fatin proklama ka haklaken Maromak futar Liafuan ba povu Maromak nian. Ambaun Leitura nian hanesan ho Altár nian. La uza fatin ne’e ba avizu ou buat seluk tan.

Pódium avizu: ida-ne’e la tau iha nivel aas hanesan ho altár maibé distánsia husi altar no tau iha sarani sira nia oin atu bele avizu buat ruma ba sarani sira.

Eukaristia: Eukaristia mak hun no tutun ba sakramentu sira seluk, ema ne’ebé iha autoridade atu selebra Eukaristia mak sira ne’ebé simu tiha ona Sakramentu Ordem, autorizasaun ne’e bazeia ba han kalan ikus nian hamutuk ho Apóstolu sira. Kristu rasik husik hela mai ita Nia futar Isin no Ran. Ema laiha devér atu halo abuzu hasoru óstia sagradu. Ema la uza sasán seluk atu silu óstia sagrada maibé nu’udar amlulik uza liman atu silu óstia. Sarani ida la uza liman fuan nakloke atu simu óstia sagrada maibé tau liman hamutuk no liman loos nu’udar tronu ba liman karuk no bele mós simu ho ibun. Sarani ida-idak hatudu ninia respeitu ba Eukaristia hodi hakneak ou hamriik.