Viqueque – Kongresu Família nian ba dala uluk organiza husi Dioseze Baucau, ohin 20 Setembru, to’o ona iha nia momentu enserramentu nian. Eukaristia prezide husi D. Basílio do Nascimento, Bispu Baucau nian no konselebra husi Mons. Ionut no amlulik na’in 15 seluk.

Molok hahú Eukaristia, Pe. Natalino Gusmão Pinto ne’ebé serbisu iha Nunsiatura, lee uluk Núnsiu Apostóliku nia mensajen ba kongresista sira, iha-ne’ebé nia louva inisiativa ne’e tan la’o ho Kreda. Oras-ne’e Amu-Papa iha dalan ba Estados Unidos atu tuir Kongresu Família Internasionál iha Philadelphia husi 22-27 Setembru 2015; eventu boot seluk Kreda nian mak Sínodu Ordináriu kona-ba Família ne’ebé sei realiza husi loron 4-25 Outubru 2015. Núnsiu konvida família sira atu iha kongresu ne’e “hametin moris família nian iha aspetu hotu” no fó Amu-Papa Francisco nia reseita: “husu lisensa, dehan obrigada/u no husu perdaun/deskulpa”.

Loron ne’e marka ho renovasaun juramentu nian ba kaben-na’in sira, ne’ebé tuir kongresu ne’e, depoizde omilia Amu selebrante nian.  Kaben-na’in sira ne’ebé mai kompletu, fó liman ba malu hodi jura ba malu sira-nia domin no fidelidade: “Ha’u, simu ó, hadomi ó, la soe iha tempu di’ak no tempu aat nia laran, to’o mate”.

Iha omilia, Amu Basílio foti inspirasaun husi Evanjellu: “Ema ne’ebé simu labarik oan ne’e ida iha ha’u-nia naran simu ha’u; no ema ne’ebé simu ha’u, la simu ha’u, maibé ida-ne’ebé haruka ha’u mai”. Asentuasaun iha liafuan “simu” (tetun) maibé loloos “acolher” (portugés). Amu-bispu esplika katak liafuan “simu” iha Timor implika “mai”, “tama mai”, “look buat ruma”, “ko’alia uitoan to’o ko’alia asuntu importante ne’ebé presiza trata”. “Tama mai” signifika “loke odamatan” no “amizade”. “Liafuan acolher signifika simu hodi rona ema seluk ho atensaun, atu hatama ema seluk ne’e iha ha’u nia fuan”. Ita simu malu iha loron hirak ne’e iha Jezús nia naran. Ita la’ós de’it tama mai, han, maibé iha “acolhimento”. Uluknana’i simu Maromak; família Viqueque sira simu família kongresista sira; feen ho laen nia esperiénsia iha loron lima ne’e nia laran iha simu malu; esperiénsia simu malu ho família dioseze rua seluk, iha ambiente kapás domin nian. D. Basílio dehan katak ita iha-ne’e “la buka solusaun ba problema família sira enfrenta, maibé, atu família rasik hola konxiénsia, rona Maromak nia Liafuan, ema seluk nia partilla, matenek-na’in sira-nia kontributu, feen ho laen rasik hametin sira-nia moris no domin”. Remata nia omilia, D. Basílio foti fali husi Núnsiu nia mensajen: “Ha’u bele/lisensa, obrigadu/a, perdaun”: Sai husi kongresu ne’e, la halo tan buat seluk, “pelumenus halo netik liafuan hirak ne’e”.

Molok bensan finál, Ir Jacinta Gusmão aprezenta relatóriu lala’ok kongresu nian no agradesimentu sira; Pe. Dionísio Sarmento, pároku hato’o mós nia lia-menon sira; no taka ho Amu-bispu nia liafuan ikus. Selebrasaun eukarístika remata ho ko’a kek no almosu. Hafoin kongresista sira fila ba fatin rasik ho fuan haksolok.