Husi irmán Dolores no irmán Simoa

Quelicai – Enkontru Animadór sira Oratóriu nian iha Animadór sira halibur iha Quelicai husi 14-16 de Dezembru 2012  ba sira-nia formasaun, konvíviu, orasaun, hetan tópiku formasaun ruma husi padre Hélio Cabral sdb no Abetu Piedade, animadór senior ida Movimentu Juveníl Salezianu nian. Iha kraik ne’e iha sínteze kona-ba sira-nia input sira.

Ha’u haklaken fiar iha Jezús ho ksolok

“Ksolok mak mensajen sentrál kristaun nian, haklaken Kristu ho ita nia moris. Ita hetan iha Biblia mensajen ksolok nian “haksolok bá …”

 

Ksolok mak Maromak – ne’e mak mensajen ne’ebé hetan iha Testamentu Foun nia laran.

Ksolok mak sarani nia espresaun. Ema sarani la haksolok ne’e la’ós sarani, tanba sira ladauk komprende saida mak sarani loos. Sarani haksolok tanba ita iha futuru.

Ita nia ksolok sei nakonu wainhira ita hamutuk ona ho Maromak, basá ita-nia fuan ne’e Maromak halo ba Nia mesak. (St. Agostinho). Oras ne’e mundu oferese buat oioin mai ita, ba ita nia ksolok. Maibé barak sei hetan terus, tan buka ksolok dala ruma iha fatin sala tan ne’e ita la haksolok. Ó labele hetan ksolok ne’e to’o nakonu (kompletu) iha ema ida, maibé ksolok ne’ebé ema fó ne’e iha momentu badak deit, basa nia naknonu de’it iha Maromak.

Haksolok basá Maromak hadomi ita no ita mós hatene katak Maromak hadomi ita, tan ne’e ita nia ksolok ne’e mai husi Maromak.

Ksolok hola parte natureza umana. Bele hetan ksolok wainhira ema ida moris tuir virtude ka  “santidade”…

Ksolok loos hetan iha vida loos no iha vida loos mak hetan ksolok.

Se ita moris didi’ak nu’udar ema sarani ita haklaken ona Kristu iha ita nia moris. Ezemplu: Moris hamutuk nu’udar komunidade ka nu’udar família, iha esperansa. Terus sei akompaña too lalehan nia odamatan maibé nia sei latama iha laran. Animadór ida tenki lori Kristu, labele lori ita nia an. Lori labarik no foin-sa’e atu deskobre Kristu”.

Pergunta atu reflete:

1. Tuir ó-nia hanoin saida mak ksolok?
2. Halo distinsaun ksolok mundu nian no lalehan nian.
3. Ha’u-nia ksolok mai husi ne’ebé?
4. Husi vida virtude nian/ buat seluk?
5. Tanbasá mak dala ruma hau lakon ksolok?

Tips atu komunika ho ksolok

Iha enkontru ne’e mós Abetu Piedade fó “tips” ruma atu aprende komunika ho ksolok. Tuir Abetu, atu halo ema seluk haksolok no dekobre ksolok loos, uluknanai ita mak tenki haksolok, ka hatene uluk kona ba ksolok ne’e. Wainhira ema ida la hatene ksolok loos, nia bele haksolok ho sala ne’ebé nia halo, tanba nia la hatene. Animadór sira, iha hakarak boot atu haklaken no lori labarik no foin-sa’e ne’ebé sira anima ne’e ba ksolok ne’ebé loos.

Tips sira atu komunika mensajen ida mak: confident, konfia an katak ó bele; Master: hatene kona ba saida mak ó atu hatoo; Body language: oinsá  ó book an iha audiénsia nia oin, tuur ka hamriik, no hare mós ba audiénsia sira nian; eye contact: wainhira ko’alia presiza mós haree ba ema nia oin, la hateke de’it ba rai no hateke sae de’it; Language: liafuan ne’ebé uza, haree ba kontestu labarik ka ema boot, ema ne’e nia background; Clarity, klaru; ko’alia klaru, lalika ko’alia tun-sae, hafoin mensajem ne’ebé atu dehan la klaru ba ema; Creative, kriativu: haree ema/ audiénsia komesa dukur ona karik halo kómiku ruma ka husu pergunta/ kanta, ema hadeer lai mak ko’alia tan; Fó ezemplu sira: wainhira ko’alia uza mós ezemplu ruma, atu halo ema hanoin hetan.