Kongresu Família Dioseze Baucau (16-20 Setembru 2015)

Viqueque – Loron daruak kongresu nian dedika ba tema “Família no kualidade moris nian”. Iha loron ne’e iha sesaun haat atu hakle’an tema ne’e, ne’ebé aprezent ahusi palestrante sira hanesan Pe. Agostinho Soares SDB, Sr. Miguel Maia, Pe. José Taçain, SDV  no Pe. Jovito do Rego no Sra. Lola.

Iha sesaun dahuluk Pe. Agostinho ko’alia kona-ba FAMÍLIA husi sikun “Doutrina Social da Igreja Católica”, oinsá Kreda fó atensaun ba família.

Reflete kona ba ema nia ezisténsia, ita  ema nia hun mai husi ne’ebé? No sé mak Família sarani sira nia modelu?  Família Santíssima Trindade mak  família sarani sira nia modelu no sira nia horik-fatin, aprende, imita no kontempla iha Nia. Presiza mantein valór/eransa espirituál Igreja Katólika nian,hodi konfronta nafatin ho referénsia fundamentál sira: Sagrada Eskritura, Dokumentu sira Igreja nian no Ensíklika sira Amu-Papa sira nian, ho nune’e bolu hikas:

• Família sira buka atu hadia no hafoun nafatin sira-nia identidade nu’udar Maromak Nia Ilas;
• Konxiente kona-ba dignidade nu’udar “pessoa-ser homem e mulher”, simu knaar dahuluk mak atu HADOMI.

Kontinua ho tema domin nian, Señor Miguel Maia (dosente UNTL), fó sasi kona-ba DOMIN no nia fó naran seluk hanesan: fidelidade, pasiénssia, haraik-an, laran-luak, laran-sadia. Domin ne’e buras iha  orasaun nia laran, nia  sai  forsa atu enfrenta difikuldade sira. Bainhira família hasoru problema, maski todan oinsá, ho orasaun fó inspirasaun atu bele mantéin intimidade,iha momentu frájil, mantein bani-been iha momentu venenu sira mosu. “Atu buras iha domin ida ne’e, ita tenke aprende kolu-an  husi verbu tolu A: angkuh ( foti-an), I: iri (laran-moras) no D: dengki( ódio)”.

Atu haburas valór sarani sira  atu bele  mantein kualidade domin iha lian Indonesia katak “Cinta: Cerita indah tiada akhir –  Domin ne’e história furak ne’ebé laiha  nia rohan”.

Pe. José Taçain lori hikas ita fila ba istória domin ne’ebé laiha rohan – liu husi Sagrada Eskritura, Família hetan nia roman no felicidade ne’ebé loos. Livru Lulik hatudu momoos kona ba “caracteristicas Domin”mak:

• Doasaun: feen-laen sira sei fo an ba malu ho feliz
• Fekundu : Fó moris/ Vida. (Husi moris hamutuk sei fó fuan).
• Fiél: “hadomi malu iha prospiedade nune’e mós iha provasaun ba moris tomak”.
• Jestu fó no simu perdaun
• Jestu haraik-an ba malu: Kaer liman hodi halo juramentu entre feen-laen.
• Aliansa : Kadeli ne’ebé fen-laen sira uza hanesan sinal fidelidade entre sira no ho Nai Maromak

• Fila fali ba liafuan xave ne’e: Maromak mak  “ Domin”, Deus é Amor (kf. 1 Joao: 4: 7-21; Joao, 13: 31 -35; Joao 21: 20 -23)
• Jezús Kristu moris iha Família ki’ik oan ida – ne’ebé hatudu kona-ba asaun konkreta husi domin Maromak nian. Jezús manisfesta nia an hanesan espozu ba nia Kreda ( 1 Pedro, 3: 1-7)
• Jezús fó afirmasaun kona-ba Aliansa Domin nian, tanba mosu perigu iha infidelidade sira:
• Adultério  divórcio ( cf. Lc 16, 18)
• Indissolubilidade : ema labele haketak buat ne’ebé Maromak tau hamutuk ona,mate make sei hapara sira.( cf. Mt 5, 32; 19:9), tamba infidelidade ema nian – ema nia fuan toos.( cf. Mt 5, 32; 19:9).

Pe. Jovito do Rego fahe kona-ba “orasaun no moris Kreda nian”, lori kongresista atu kl’ean ho ita-an rasik, hasoru malu ho Maromak, orasaun loloos lori ita ba konversaun no transformasaun. Kontaktu pesoál ho Maromak Futar Lia, Liturjia, Sakramentu sira, meiu hotu ne’ebé tulun sarani/kaben-na’in sira atu hasoru malu ho Maromak. Tanba ne’e presiza atitude: hamamuk an, abandona an iha Maromak, nu’udar Santu Inácio de Loyola halo ezersísiu iha nia orasaun: saran nia liberdade, memória, entendimentu no vontade tomak. Husik Espíritu  enxe  ita-nia  fuan, nune’e iha kbi’it no forsa halo peregrinasaun iha mundu ida-ne’e.

Iha parte ikus Sra Lola, fó sasin kona-ba nia esperiénsia orasaun ninian: sai rezumu ba tópiku hotu ne’ebé mak ita rona loron tomak kona ba saída mak Domin loloos, “buat ne’ebé ulun labele rezolve, fuan iha nia lójika atu hetan solusaun”.