Dili – Iha loron 23–28 Agostu, Irmán Alma Castagna (inspetora FMA TIN) dedika loron hirak ne’e atu fó formasaun ba diretora foun na’in rua : Ir Cecilia del Mundo ba uma S. José-Novisiadu no Ir. Veronika Feny Kusnadi ba uma Divina Providénsia.

Iha momentu formasaun ne’ebé hahú ho orasaun kona-ba dalan Emaus: íkone ida ne’ebé akompaña, ne’ebé fó hanoin kona-ba importánsia enkontru nian ho Jezús ne’ebé loke ema nia matan no halo ema troka totalmente. Ne’e hatudu oinsá enkontru ninia importánsia ne’ebé sei fó tulun atu harii relasaun di’ak ida. No mós hare oinsá atu governa la’ós atu sai hanesan ema ida ne’ebé autoritária  ka  “liurai feto” ida iha komunidade laran maibé sai animadora iha komunidade.

Animadora ida ne’ebé anima ho fuan inan nian hodi hateke ba Na’i-Feto nu’udar modelu.  Modelu ba akompañamentu husi Bíblia mak Moisés ne’ebé ho fidelidade  no fó-an tomak hala’o knaar ne’ebé nia simu husi Maromak atu lori povu Israel sai husi rai Egipto maski nia rasik sei la tama iha rai promesa.

Tuir liña karizma nian, modelu animadora mak ita nia Madre Maria Domenica Mazzarello ne’ebé halo Jezús nu’udar sentru moris nian no uza razaun no “amorevolezza” atu akompaña Irmán no foin-sa’e sira atu hamutuk buka Maromak nia hakaran ba ida-idak. Nune’e serbisu nu’udar animadora iha komunidade la’ós de’it diretora ninia serbisu maibé hamutuk, katak komunidade tomak, membru ida-idak  tenke kontribui no fó an atu bele lori komunidade to’o finalidade ida. Finalidade ne’e mak santidade.