RV – Iha katekeze kuarta, 19 Agostu, Papa Francisco dedika ba família nia relasuan ho serbisu. Nu’udar atividade ida ne’ebé lori dignidade ba ema, serbisu mós, buat sagradu ida, halo parte ba Maromak nia projetu kriadór no labele falta ba família ida-idak.

Download

Papa Francisco fó hanoin katak serbisu nesesáriu atu mantein família no garante moris dignu. No estilu vida serbisu-dór nian mak buat ruma ema aprende, uluknanai iha família. “Família eduka ba serbisu ho aman-inan sira nia ezemplu: aman no inan ne’ebé serbisu ba família no sosiedade nia di’ak”.

Amu-Papa temi mós armonia ne’ebé eziste entre serbisu no orasaun. Falta serbisu la halo di’ak ba espíritu, hanesan ne’e mós falta orasaun prejudika ativida prátika. Serbisu mak sagradu, Papa Francisco destaka, nune’e jere serbisu mak responsabilidade umana no sosiál boot liu ne’eb´elabele husik iha ema balun  de’it nia liman laran.

“Hamosu lakon fatin serbisu nian signifika hamosu danu sosiál boot. Ha’u sai triste bainhira haree katak iha ema lahó serbisu, ne’ebé la hetan serbisu no la iha dignidade atu lori paun ba uma”.

Amu-Papa esplika mós katak serbisu halo parte projetu kriadór Maromak nian, maibé bainhira haketak an husi aliansa ida-ne’e, nia sai atan ba lójika lukru nian; no hodi despreza domin sira afetu sira moris nian, hamosu degradasuan klamar nian ne’ebé kontamina buat hotu.

“Vida sivíl sai dodok no habitat sai aat. Konsekuénsia sira kona liuliu mak sira ne’ebé kiak liu, família sira ne’ebé kiak liu. Organizasaun moderna serbisu nian hatudu, dalaruma, tendénsia perigoza atu konsidera família nu’udar obstákulu ida, naha-todan ida, passividade ida ba produtividade serbisu nian. Maski nune’e, ita husu tok: produtividade ida-ne’ebé? No ba sé?”, Amu-Papa kuestiona.

Iha buat sira-ne’e nia oin, Papa Francisco hateten katak família  sarani sira iha dezafiu no misaun boot ida: karrega fundamentu sira kriasaun Maromak nian. Knaar la’ós fasil, nune’e, presiza fiar no komprensaun.